भत्तपुर, ३ फागुन । भत्तपुरको कमल पोखरी अवैध हिसाबले किनबेच र दर्ता भएकाले सार्वजनिक पोखरीकै रुपमा फर्काउन माग गर्दै मध्यपुरथिमिका बासिन्दाले बिहिबार भक्तपुर जिल्ला अदालतमा धर्ना दिएका छन् ।

धार्मिक र साँस्कृतिक महत्व बोकेको पोखरीमाथि विभिन्न भू माफियाले चलखेल गर्दै अवैध रुपमा दर्ता तथा किनबेच गरिरहेको पाईएकोले पोखरीको संरक्षणको माग गर्दै स्थानियले दबाब स्वरुप धर्ना दिएका हुन् । मध्यपुरथिमि नगरपालिका–८ बोडेका स्थानीय बासिन्दाले हातहातमा प्ले कार्ड बोकेर अदालतमा दिनभर धर्ना दिएका छन् ।

भक्तपुर जिल्ला अदालतमा पोखरीको विषयमा बहस भएपछि स्थानीय बासिन्दाले परापूर्वकालदेखि धार्मिक कार्यका लागि प्रयोग हँुदै आएको उक्त पोखरीको अवैध दर्ता एवं किनबेच भएको भन्दै स्थानीयले पोखरी सार्वजनिक हुनुपर्ने माग गरेका थिए ।

तत्कालीन बोडे गाउँ पञ्चायत–६ कित्ता नं। १ को १५ रोपनी ९ आना सार्वजनिक जग्गा २०४२ सालमा व्यक्तिको नाममा दर्ता भई बिक्री वितरण गरेको भन्दै बोडेका बासिन्दाले सो पोखरी सार्वजनिक रुपमै फर्काइनुपर्ने माग राखेका हुन् ।

अदालत परिषरमै आएर मध्यपुरथिमि नगरपालिकाका नगरप्रमुख मदनसुन्दर श्रेष्ठले आफूहरु सानो छँदा कमलको फूल फुल्ने र पौडी खेल्ने यो पोखरी सार्वजनिक पोखरी कै रुपमा फर्काइनुपर्नेमा जोड दिनुभयो ।

पोखरी किनबेच भएपछि चार वर्ष अगाडि केही व्यक्तिले पोखरी पुर्न माटो ल्याउँदा स्थानीयले लखेटेको बताउँदै उहाँले ऐतिहासिक पोखरीलाई पोखरी कै रुपमा कायम गर्न अदालतसँग माग गरेको उहाँले बताउनुभयो ।

२०४२ साल असार ३१ गते उक्त पोखरी कान्छी पोडेनीको नाममा दर्ता भई २०५१ साल माघ २२ गते अधिकृत वारेशनामा बकसपत्र गरी मनाङ्ग घरभई काठमाडौं ठमेल बस्ने ग्ल्याल्पो गुरुङ्गको नाममा पास भएको हो ।

जसमध्ये १३ रोपनी ९ आना ग्ल्याल्पोको नाममा, १ रोपनी तेन्जी शेर्पिणीको नाममा, एक रोपनी कर्सी जद्योना गुरुङ्गको नाममा पास गरी हाल ग्ल्याल्पोले अन्य विभिन्न व्यक्तिको नाममा जग्गा पास गरेर बिक्री गरेको पाइएको छ ।