काठमाडौं १९ पौष । स्वतन्त्र ऊर्जा उत्पादकहरूको संस्था, नेपाल ईप्पान०ले नेपालमा उत्पादित सबै विद्युत् खरिद हुनेगरी भारतसँग विद्युत् खरिद सम्झौता गर्न सरकारलाई सुझाव दिएको छ ।

भारतीय विदेशमन्त्री एस जयशंकरको नेपाल भ्रमणको क्रममा १० हजार मेघावाट विद्युत् खरिद सम्झौता हुने चर्चा भइरहेका बेला ईप्पानका अध्यक्ष गणेश कार्कीले यस्तो बताएका हुन् । न्युज एजेन्सी नेपालसँग कुरा गर्दै ईप्पानका अध्यक्ष कार्कीले नेपालमा उत्पादित जलविद्युत् जोसुकैले लगानी गरे पनि त्यसको खरिद भारतले गर्नेगरी सम्झौता गर्न सरकारसँग आग्रह गरे । बंगलादेशले पनि भारतको बाटो हुँदै दीर्घकालीन रूपमा विद्युत् खरिद गर्न पाउने प्रावधान अनिवार्य राख्न पनि सरकारलाई उनले सचेत गराए ।

तत्कालका लागि बंगलादेशले पनि नेपालसँग पाँच हजार मेघावाट विद्युत् खरिद गर्न चाहेकाले त्यसको पनि सुनिश्चित हुनेगरी सरकारले भारतसँग उक्त सम्झौता गर्न उपयुक्त हुने अध्यक्ष कार्कीको भनाइ छ ।

उनले भारतसँग विद्युत् खरिद सम्झौता गर्दा नेपालमा कुनै पनि देशले विद्युतमा लगानी गर्नसक्ने वातारण बनाउने कुरामा पनि सरकार अडिग रहनुपर्नेमा उनको जोड छ । नेपालको समृद्धिका लागि सरकारले दश वर्षमा दश हजार मेघावाट विद्युत् उत्पादन गर्ने लक्ष्य लिएकाले त्यसका लागि वाह्य लगानी आवश्यक भएको भन्दै त्यसलाई पनि ध्यान दिएर भारतसँग सरकारले सम्झौता अघि बढाउनुपर्ने उनको धारणा छ ।

ईप्पानले सरकारले विद्युत् उत्पादनमा जोड दिन सकेमात्रै खरिदको कामलाई पनि अघि बढाउन सक्ने बताएको छ । अध्यक्ष कार्कीले त्यसका लागि कुनै पनि देशबाट नेपालमा लगानी भित्र्याउने वातावरण निर्माणमा पनि सरकार केन्द्रित हुनुपर्ने बताए । उनले नेपालमा विद्युत् उत्पादन र खरिदका लागि उपयुक्त समय भएकाले यस अवसरलाई सरकारले खेर फाल्न नहुने दोहोर्याए ।