काठमाडौं १७ पौष । बाङ्लादेशका नोबल पुरस्कार विजेता मोहम्मद युनुसलाई त्यहाँको एक अदालतले ६ महीनाको जेल सजाय तोकेको छ।

देशको श्रम कानून उल्लंघन गरेको आरोपमा उनलाई जेल सजाय भएको हो। उनले स्थापना गरेको मोबाइल फोन कम्पनी ‘ग्रामीण टेलिकम’ ले आफ्ना मजदूरका निम्ति कल्याणकारी कोष स्थापना नगरेको भन्दै उनलाई दोषी प्रमाणित गरिएको हो।

प्राध्यापक युनुस बाङ्लादेशकी प्रधानमन्त्री शेख हसिनाको आलोचकका रूपमा चिनिंदै आएका छन्। उनका समर्थकले अहिलेको फैसला पनि राजनीतिक उद्देश्यप्रेरित भएको आरोप लगाएका छन्।

“अदालतमा मेरा वकीलहरूले तर्क गरे जस्तै यो आदेश अहिलेसम्मका सबै नजीर र तर्क विपरीत छ,” अदालतले आदेश गरे लगत्तै प्राध्यापक युनसले टिप्पणी गरे, “म सबै बाङ्लादेशी जनतालाई अन्यायको विरुद्ध आवाज उठाउन र लोकतन्त्र एवं हामी सबैको मानव अधिकारको पक्षमा उभिन आह्वान गर्छु।”

लघुवित्त मार्फत गरीब जनताको उन्नतिका लागि काम गरेकै कारण युनुसले सन् २००६ मा नोबल पुरस्कार पाएका थिए। ८३ वर्षीय युनुसको समर्थनमा गत भदौमा १७० भन्दा बढी विश्वका नेता र नोबल पुरस्कार विजेताले हसिना समक्ष अनुरोध गरेका थिए।