काठमाडौं, १ फागुन । माओवादी केन्द्रका अध्यक्ष पुष्पकमल दाहाल प्रचण्डले एमालेसँगको पार्टी एकता सकेसम्म मंगलबार नै टुंग्याउने बताएका छन् ।

जनयुद्ध दिवस सदन्र्भको माओवादी पार्टी कार्यालय पेरिसडाँडामा भएको कार्यक्रममा बोल्दै प्रचण्डले वाम एकता सकेसम्म मंगलबार नै टुंगिने र आफूहरु त्यसको अन्तिम प्रयासमा लागेको बताएका छन् ।

उनले भने ‘ओली जीले देशको सामाजिक तथा राजनीतिक परिवर्तनमा जनयुद्धको भूमिका स्वीकार गर्नुभएको छ । मैले पार्टी एकता आजै टुंग्याउन पाए भोलि परेको जनयुद्ध दिवसमा माओवादी जनयुद्धमा लागेका सबै खुशी हुने बताएको छु ।’

नयाँ पार्टीको नेतृत्वका विषयमा रहेको विवाद पनि लगभग टुंगिएको बताउँदै उनले सहअध्यात्मक प्रणाली अर्थात ओली र आफू दुवै संयुक्त नेतृत्वमा रहने गरी सहमति जुटेको संकेत गरे ।

यस्तै उनले आफ्नो गुरुको रुपमा रहेका मोहन वैद्य किरण र नेत्रविक्रम चन्द विप्लवलाई पनि पार्टी एकताको अभियानमा आउन आग्रह गरे । आफ्नो आग्रह गम्भीर रहेको उनको भनाई छ ।

मंगलबार पार्टी एकताबारे अन्तिम छलफलका लागि ओली र प्रचण्डबिच भेट हुँदैछ । तर भेटको समय र स्थान भने सार्वजनिक गरिएको छैन ।