काठमाडौं, १ फागुन । माओवादी केन्द्रका अध्यक्ष पुष्पकमल दाहाल प्रचण्डले सबै कम्युनिष्टहरुलाई समाजवादी अभियान सहभागी हुन आग्रह गर्नुभएको छ ।
भातृसंस्था वाइसिएलले पेरिसडाँडामा आयोजना गरेको जनयुद्ध दिवस कार्यक्रममा बोल्दै अध्यक्ष प्रचण्डले अब नयाँ समाजवादी क्रान्ति सुरु भइसेकेको भन्दै कम्युनिष्टहरु एक ठाउँमा नभई समाजवाद जिन्दावाद भन्नुको कुनै अर्थ नभएको पनि प्रष्टाउनुभयो ।
अहिले कम्युनिष्टहरुले अवसर र नेतृत्व पाएकाले यो अभियान एकताबद्ध भएर अघि बढ्न सबैलाई आग्रह गर्नुभयो । बृहत छलफलबाट मात्रै क्रान्ति सफल हुने भन्दै सबै एकिकृत भएमा समाजवाद र समृद्धि एकैसाथ बढ्ने विश्वास व्यक्त गर्नुभयो ।
अध्यक्ष प्रचण्डले जनयुद्धको स्मरण गर्दै जनता नै शक्तिशाली र महान भएकाले जनतासंग छलेर कुनै घटना घटाएर क्रान्ति जित नसकिने भन्दै लाखौं करोडौंको एकताबाट मात्र समाजवाद सफल हुने बताउनुभयो । आफूहरुले पनि जनयुद्ध कालमा छिट्टै परिर्वतन चोहेपनि जनताको आवद्धताविना सफल नभएको अनुभव सुनाउनुभयो ।
अध्यक्ष प्रचण्डले आफूबाट छुटेर जानुभएका मोहन बैद्य र विप्लवलाई शक्तिशाली कम्युनिष्ट केन्द्र बनाउन अभियानमा सहभागी हुन अपील गर्नुभएको छ । रहर र लहडमा क्रान्ति नहुने भन्दै परिस्थिति अनुसार अघि बढ्ने र शक्ति संचयका लागि पछि पनि हट्नुपर्ने भन्दै प्रचण्डले विप्लवलाई दिवास्वप्नबाट ब्यूझेर छलफलबाटै निकास निकाल्न पनि आग्रह गर्नुभयो ।
प्रतिक्रिया दिनुहोस्