बुटवल, २८ माघ ।
नेकपा एमालेका उपमहासचिव रुपन्देही २ का प्रतिनिधीसभा सदस्य विष्णु पौडेलले प्रदेशको स्थायी राजधानी रुपन्देहीबाट कसैले हटाउन नसक्ने बताउनुभएको छ । पश्चिम नेपाल बस ब्यवसायी समितीको साधारणसभाको आज बुटवलमा उदघाटन गर्दै उपमहासचिव पौडेलले सिंगो प्रदेशको अवस्था र विवेचनाबाट नै प्रदेशको केन्द्र चयन गरिएकोले रुपन्देहीबाट केन्द्र हट्न नसक्ने धारणा राख्नु भयो ।
पांच नंम्बर प्रदेश अन्तर्गत तिनवटा शहरहरु बुटवल, दाङ, र नेपालगन्जका आसपासका नगरपालिका तथा गांउ पालिकाहरुलाई समेटेर महानगरपालिका बनाउने लक्ष्यका साथ लाग्नुपर्नेमा उहांले जोड दिनुभयो।

कार्यक्रममा अध्यक्षको प्रतिबेदन प्रस्तुत गर्दै संघका अध्यक्ष दधिराम खरेलले सडकको बिस्तार नहुने तर यातायातका साधन निरन्तर आयात हुन दिने हो भने यातायात ब्यवसाय धारासायी हुने बताउनुभयो । यातायात ब्यवसायलाई मर्यादित बनाउन आलोपालो गरि निजी क्षेत्रले यातायात संचालन गर्दा सेण्डीकेट गरेको आरोप लगाईएको बताउंदै खरेलले सरकारले गर्नुपर्ने ब्यवस्थापनको काम ब्यवसायी आफैले गरेको दाबी समेत गर्नुभयो ।
संघको आगामी नेतृत्वको लागि व्यवसायीहरुले सोमबार मतदान गर्ने भएकाछन् । नयां नेतृत्वको लागि सोमबार हुने निर्वाचनमा नेतृत्वको लागि बामगठबन्धन र नेपाली कांग्रेसको दुई प्यानल बिच प्रतिष्पर्धा हुने भएको छ ।
बामगठबन्धन प्यानलको नेतृत्व बर्तमान अध्यक्ष दधिराम खरेलले गरेका छन् भने नेपाली कांग्रेस प्यानलको नेतृत्व पुर्व अध्यक्ष दामोदर ज्ञवालीले गरेका छन् ।