काठमाडौं ५ मंसिर । सर्वोच्च अदालतको न्यायाधीश नियुक्तिमा प्रमुख दलहरूले भागबण्डा गरेका छन्। जसमा नेपाली कांग्रेस निकट कानुन व्यवसायी र एमाले निकट कानुन व्यवसायीबाट एक–एक जनालाई न्यायाधीश बनाइएको छ।

माओवादीको लागि एक जना कोटा छुट्याइएको छ। सर्वोच्च अदालतमा ७ जना न्यायाधीश रिक्त भए पनि माओवादीको कोटाबाट नाम आउन नसक्दा मंगलबार ६ जना मात्रै न्यायाधीश नियुक्तिका लागि सिफारिस गरिएको हो।
न्याय परिषद्ले ४ जना उच्च अदालतका न्यायाधीशबाट सर्वोच्चको न्यायाधीश नियुक्तिका लागि सिफारिस गरेको छ। कानुन व्यवसायीबाट न्यायाधीश बनेकी सारंगा सुवेदी हाल उच्च अदालत जनकपुरको कामु मुख्य न्यायाधीश छिन्।

नायव महान्यायाधिवक्ताबाट न्यायाधीश बनेका महेश शर्मा पौडेल हाल उच्च अदालत पाटनका प्रमुख न्यायाधीश छन्।

टेकप्रसाद ढुंगाना उच्च अदालत पाटनको दोस्रो वरियताका न्यायाधीश हुन्। अब्दुल अजिज मुसलमान पनि उच्च अदालत हेटौँडाका कामु मुख्य न्यायाधीश हुन्। उनीहरूलाई सर्वोच्च अदालतको न्यायाधीश नियुक्तिका लागि सिफारिस गरिएको छ।
कानुन व्यवसायीबाट दुई जना न्यायाधीशका लागि सिफारिस भएका छन्। नेपाली कांग्रेस निकट कानुन व्यवसायीबाट वरिष्ठ अधिवक्ता सुनिल पोखरेल सर्वोच्चको न्यायाधीशमा सिफारिस भएका छन्। एमालेको कोटाबाट बालकृष्ण ढकाललाई न्यायाधीश नियुक्तिका लागि सिफारिस गरिएको छ।

पोखरेल नेपाल बार एसोसिएसनको पूर्व महासचिव समेत हुन्। बालकृष्ण ढकाल सर्वोच्च बार एसोसिएसनको पूर्व सचिव हुन्। उनी एमाले निकट कानुन व्यवसायी हुन्।

जसमा चार जना उच्च अदालतका न्यायाधीश हुन्। अब एक जना पनि वकिलकै कोटाबाट न्यायाधीश बन्ने न्याय परिषद्का एक सदस्यले बताए।

माओवादीको कोटाबाट भने न्यायाधीश नियुक्त गर्न बाँकी छ। न्यायाधीशमा सिफारिस भएका व्यक्तिहरूको सुनुवाइका लागि अब संसदीय सुनुवाई समितिमा पठाइनेछ। सुनुवाइ भएर अनुमोदन भएपछि उनीहरू न्यायाधीश बन्नेछन्।