काठमाडौं । बजारमा चिनीको अभाव देखिएसँगै चिनी तस्करी बढ्न थालेपछि अहिले सुरक्षाकर्मी परिचालन गर्दै सरकारले चिनी बरामद थालेको छ ।

बजारमा चिनीको अभाव हुन नदिन सरकारले नेपाल प्रहरी र सशस्त्र प्रहरी बल लगायतका निकाय परिचालन गर्ने निर्णय गरेको छ ।

बिहीबार प्रधानमन्त्री तथा मन्त्रिपरिषद् कार्यालयमा भएको सरोकारवालाहरुको बैठकले प्रहरी प्रशासन परिचालन गरेर आयातकर्ता र उद्योगहरुमा चिनीको भण्डारण खोजतलास गर्ने र भेटिएको चिनी बजारमा पठाउने निर्णय भएको थियो ।

सोही निर्णयअनुसार तस्करी भई काठमाडौं भित्र्याउँदै गरेका चिनी नेपाल प्रहरीले बरामद थालेको छ । सबैभन्दा काभ्रे भन्ज्याङमा चिनी बरामद भएका छन् । साना गाडीका छत, डिकीमा लुकाई ल्याएको चिनी प्रहरीले बरामद गरेको हो । त्यस्तै, उपत्यका छिर्ने थानकोट लगायतका नाकाबाट समेत लुकाई छिपाई काठमाडौं ल्याउँदै गरेको चिनी बरामद गरिएको प्रहरीले जनाएको छ ।

नेपाल प्रहरीका केन्द्रीय प्रवक्ता डीआइजी कुबेर कडायतले सबै नाका र बजारहरुमा लुकाई छिपाई कालोबजारी गरेको पाइएमा प्रहरीले छापा मार्ने र नियन्त्रणमा लिने काम भइरहेको जानकारी दिए ।

लुकाई छिपाई तस्करी गरेको पाइएमा वा चिनी गोदामहरुमा लुकाई छिपाई राखेको अवस्थामा छापा मार्ने र नियन्त्रणमा लिने समेत काम भइरहेको उनको भनाइ छ ।

बजारमा चिनीको कृत्रिम अभाव सृजना गरिएको, उपभोक्ताबाट उच्च मूल्य असुल गरिएको र बजारमा चिनीको कृत्रिम भण्डारण गरिएको सूचनापछि यस्तो निर्देशन भएको प्रधानमन्त्री तथा मन्त्रिपरिषद् कार्यालयले जनाएको छ ।

प्रधानमन्त्री कार्यालयका सचिव डा. गणेश पाण्डेयको अध्यक्षतामा नेपाल प्रहरी, सशस्त्र प्रहरी, वाणिज्य मन्त्रालय र भन्सार विभागलगायतका निकायको अधिकारीहरु सम्मिलित केन्द्रीय संयन्त्र बनाइएको छ ।

नेपालमा चिनी उद्योगहरु र आयातकर्ताले चिनीको मौज्दात राखेको हुनसक्ने भन्दै सबै उद्योगमा प्रहरी परिचालन गरेर विवरण संकलन गर्न र सोको विवरण पेश गर्न पनि प्रहरी प्रशासनलाई जिम्मेवारी तोकेको छ ।

नेपाल प्रहरीले आयातकर्ता र उद्योगहरुमा रहेको चिनीको विवरण संकलन गर्ने, प्रमुख जिल्ला अधिकारीले यस्तो विवरण शुक्रबारसम्म प्रधानमन्त्री कार्यालयमा पेश गर्ने र चिनी मौज्दात रहेकाहरुसँग लिएर बजार पठाउने भएको छ ।