काठमाडौं, १६ कात्तिक । नेकपा माओवादी केन्द्रले जारी पार्टी रुपान्तरण अभियानबाट विगतमा भएका अन्तरविरोध हल हुँदै गएको निचोड निकालेको छ ।

पेरिसडाँडामा आयोजित पत्रकार सम्मेलनमा प्रवक्ता अग्नि सापकोटाले शीर्ष नेताहरुबीचको समीक्षाको निचोड सुनाउँदै पार्टी चलायमान भएको बताए ।

“विविध ढंगले अभियान चलिरहेको छ । विगतका अन्तरविरोध हल हुँदै गएको छ,” उनले भने, “पार्टी चलायमान भएको छ । सक्रिय भएको छ ।”

उनले अभियान चरण–चरणमा जाने बताए । जनतासँग एकाकार हुने कुराको महत्व रहेको सुझाव आएको उनले बताए ।

उनले जनताले पार्टीको कुरा सुनेको पनि बताए । “जनताले हाम्रा कुरा सुनेका छन् । जनताको विश्वास आर्जन गर्दै पार्टी अब उकालोतिर यात्रारत छ,” सापकोटाले भने ।

माओवादीले दुई महिनायता पार्टी रुपान्तरण अभियान चलाइरहेको छ ।