काठमाडौँ, १५ कातिक । प्रमुख प्रतिपक्षी दल नेकपा एमालेले आज चाडपर्व लक्षित चियापान तथा शुभकामना आदानप्रदान कार्यक्रम गरेको छ। दसैं, तिहार, नेपाल संवत, छठ पर्वलगायतको पर्वको अवसर पारेर एमालेले आज पार्टी मुख्यालय च्यासलमा शुभकामना कार्यक्रम राखेको हो। एमालेले हरेक वर्ष दसैं र तिहारका बीचमा शुभकामना आदान–प्रदान कार्यक्रम राख्दै आएको छ।

सबै राजनीतिक दल र उच्च पदस्थ व्यक्तिहरूलाई चियापानका लागि एमालेले मुख्यालयमा बोलाएको छ। चियापान समारोहमा प्रधानमन्त्री, विपक्षी दलका नेता, सांसदहरू, पार्टीका नेता कार्यकर्ता सहभागी भए ।यसपटकको चियापानमा नेकपा एमालेले एमाले विभाजनपछि बनेको नेकपा एकीकृत समाजवादी पार्टीलाई पनि चियापानमा निम्त्याएको थियो। तर उक्त चियापान कार्यक्रममा नेकपा एकीकृत समाजवादी पार्टीका अध्यक्ष माधवकुमार नेपाल भने सहभागी भएनन्। उक्त पार्टीका अन्य शीर्ष नेता भने सहभागी भए।