काठमाडौं, १५ कात्तिक । ल्याटिन अमेरिकी राष्ट्र बोलिभियाले इजरायलसँग कूटनीतिक सम्बन्ध तोड्ने घोषणा गरेको छ ।
इजरायलले गाजामा आक्रमण गरी हजारौँ निर्दोष प्यालेस्टाइनी नागरिकको हत्या गरेको कारण उससँगको कूटनीतिक सम्बन्ध तोड्ने निर्णय गरिएको बोलिभियाका उपविदेशमन्त्री फ्रेडी ममानीले बताएका छन् । उनले इजरायलको कदमलाई ‘आक्रामक’ बताएका छन् ।
बोलिभिया ल्याटिन अमेरिकाको पहिलो देश हो, जसले जारी इजरायल–हमास युद्धका कारण इजरायलसँग कूटनीति सम्बन्ध तोड्ने घोषणा गरेको छ ।
बोलिभियाले यसअघि गाजामा युद्धविरामको लागि आह्वान गरेको थियो र गाजामा मानवीय सहायता पठाउने घोषणा गरेको थियो ।
गाजापट्टीलाई लिएर बोलिभियाले यसअघि पनि इजरायलसँग सम्बन्ध तोडेको थियो । करिब एक दशक इजरायलसँग सम्बन्ध तोडेपछि सन् २०१९ मा पुनः कूटनीतिक सम्बन्ध स्थापना गरेको थियो ।
प्रतिक्रिया दिनुहोस्