बुटवल, २७ माघ ।
संघीय संरचना अन्तर्गतको पहिलो मुख्य मन्त्री ५ नम्बर प्रदेशले पाउने भएको छ । नेकपा एमाले र माओबादी गठबन्धनको संसदियदलले आईतबार बहुमत सहितको दाबी प्रस्तुत गर्ने भएपछि प्रदेश नम्बर ५ ले पहिलो मुख्य मन्त्री पाउने भएको हो ।
प्रदेश सरकार गठन गर्नका लागि आईतबार गठबन्धनले प्रदेश प्रमुख समक्ष दाबी प्रस्तुत गर्ने एमाले उपमहासचिव तथा एमालेका प्रदेश संयोजक बिष्णु पौडेलले जानकारी दिनु भएको छ ।
आईतबार दाबी प्रस्तुत गरे लगत्तै प्रदेश प्रमुख उमाकान्त झाले एमाले संसदियदलका नेता शंकर पोखरेललाई मुख्य मन्त्रीमा नियुक्त गर्नेछन् । मुख्यमन्त्रीको सपथग्रहणका लागि आजै प्रदेश प्रमुख सहित नेता शंकर पोखरेल , एमाले उपमहासचिव बिष्णु पौडेल सहितको टोलीले सपथग्रहण स्थलका लागि स्थानको अवलोकन समेत गरेकाछन् ।
एमालेको ५ नम्बर प्रदेशका सचेतक भुमिश्वर ढकालले पनि आईतबार बाम गठबन्धनको तर्फबाट सरकार गठनको प्रस्ताव प्रस्तुत गरिने तथा प्रदेश प्रमुखको निजि सचिवालयको प्राङ्गणमा सपथ ग्रहण हुने बताउनुभयो ।
प्रदेशमा सरकार गठन लगत्तै मन्त्रालयहरु स्थापना गर्न समेत सम्भाव्य मुख्य मन्त्री पोखरेल सहितको टोलिले बुटवलका बिभिन्न कार्यालयहरुको निरिक्षण गरेकाछन् । सचेतक ढकालका अनुसार प्रदेशका मुख्य मन्त्रीले सुरुमा ३ सदस्सीय मन्त्री मण्डल गठन गर्नेछन् । सानो आकारको मन्त्रीमण्डल बनाउने बिषयमा यस अघिनै एमाले संसदियदलका नेता पोखरेलको बिचार सार्वजनीक भै सकेको छ ।