काठमाडौं, ७ असोज। नेपालले ताइवानी पृथकतावादी गतिविधि विरुद्ध रहेको प्रष्ट पारेको छ । चीन भ्रमणमा रहेका प्रधानमन्त्री पुष्पकमल दाहाल प्रचण्डसहितको प्रतिनिधिमण्डले शीर्ष चिनियाँ नेतृत्वसँग गरेको दुईपक्षीय वार्तापछि जारी संयुक्त प्रेस विज्ञप्तिमा नेपाल ताइवानको पृथकतावादी गतिविधि विरुद्ध रहेको प्रष्ट पारिएको छ ।

नेपालले एक चीन नीतिप्रति पुनः दृढ प्रतिवद्धता जनाउँदै ताइवानको स्वतन्त्रताको पक्षमा हुने कुनै पनि गतिविधिको विरुद्धमा रहेको प्रष्ट पारेको हो ।

नेपालको परराष्ट्र मन्त्रालय र चिनियाँ विदेशमन्त्रालयद्वारा जारी संयुक्त विज्ञप्तिमा भनिएको छ, ‘नेपाली पक्षले एक चीन सिद्धान्तप्रति दृढ प्रतिबद्धता दोहोर्‍याएको छ। चीनको सरकार सिंगो चीनको प्रतिनिधित्व गर्ने एकमात्र कानुनी सरकार हो र ताइवान चीनको भूभागको अविभाज्य भाग हो भन्ने मान्यता राख्दै नेपाली पक्ष ताइवानको स्वतन्त्रताको विरुद्धमा छ ।’

नेपालले तिब्बत मामिला पनि चीनको आन्तरिक मामिला भएको प्रष्ट पारेको छ । ‘नेपालको भूमिमा चीन विरुद्ध कुनै पनि पृथकतावादी गतिविधि हुन नदिने कुरा नेपालले दोहोर्याएको छ’, विज्ञप्तिमा भनिएको छ ।

चीनले मित्रता, इमानदारी, पारस्परिक लाभ र समावेशीताको सिद्धान्त र छिमेकीमा मित्रता र साझेदारी कायम गर्ने नीतिप्रति आफ्नो प्रतिबद्धता दोहोर्‍याएको छ ।

“चीनले नेपालको स्वतन्त्रता, सार्वभौमसत्ता र भौगोलिक अखण्डतालाई कायम राख्न दृढताका साथ समर्थन गर्दछ र नेपालको स्वतन्त्र छनोटको सामाजिक व्यवस्था र राष्ट्रिय परिस्थिति अनुकूल विकास मार्गको सम्मान र समर्थन गर्दछ,” संयुक्त विज्ञप्तिमा भनिएको छ।