काठमाडौं,२६माघ। प्रहरीले दरबारमार्गको ल्याण्डमार्क होटलमा पीडित युवतीको सामूहिक बलात्कार भएको निष्कर्ष निकालेको छ ।
प्रहरीकै मिलेमतोमा घटना लुकाएको खबरहरु संचारमाध्यमा प्रकाशन प्रशारण हुन थालेपछि काठमाडौं प्रहरी परिसरले एसपी रामदत्त जोशीको नेतृत्वमा छानबिन समिति गठन गरेको थियो ।

छानविन समितिले बिहीबार बुझाएको प्रतिवेदनमा युवतीमाथि सामूहिक बलात्कार भएको देखिएको छ । अहिलेसम्म शैलेश कार्कीसहित विकास गौतम, दिपक श्रेष्ठ र रवि पौडेल संलग्न देखिएको प्रहरीको अनुसन्धानले पछि खुलेको छ ।

‘यो बलात्कार हो भनेर हामीले मुद्दा चलाउन उठाएका छौं’ एसपी जोशीले भने । माघको ७ गते रात होडलमा ‘प्रेमी’ शैलेशसँग होटलमा पुगेकी २१ वर्षीया युवती सामूहिक बलात्कारमा परेकी थिइन् । उनले भोलिपल्ट विहान दरबारमार्ग वृत्तमा पुगेर सामूहिक बलात्कारको मौखिक उजुरी दिएकी थिइन् । तर, दरबारमार्ग प्रहरीकै संलग्नतामा आर्थिक लेनदेनमा मिलापत्र गरिएको थियो, जसमा आफूहरुबीच सहमतिमै शारीरिक सम्बन्ध भएको र होटलमा छाडेर गएको रिसमा मात्र सामूहिक बलात्कार भएको भन्दै उजुरी गरेको उल्लेख छ ।

सुरुमा प्रहरीसँग सम्पर्कबिहीन भएकी पीडित युवती केही दिनमा सम्पर्कमा त आइन् तर, सहमतिपत्रमा उल्लेख भए जस्तै आफू बलात्कार नभएको बयान दिएकी थिइन् । यसले घटना सामूहिक बलात्कार भए नभएको प्रश्न उठेको थियो । यता प्रहरी छानबिनले भने पीडित युवती समूहिक बलात्कारको भएको देखाएको छ ।
छानबिनका क्रममा पीडित परिवारलाई आर्थिक प्रलोभन देखाएर मिलापत्र गरेको देखिएको छ भने पीडितको आमाको खातामा २७ लाख देखिएको छ । छानविन समितिले उक्त घटनामा मिलापत्र गराउन दरबारमार्ग बृत्तको भूमिका खेलेको ठहर गरेको छ ।
परिसरका प्रवक्ता समेत रहेका जोशीले भने, ‘बलात्कारको मुद्धामा मिलापत्र गर्नु नै गैरव्यवसाीयक हो । योे घटनामा संलग्न प्रहरीलाई जिम्मेवारीबाट हटाइएको छ ।’

छानविन टोलीले प्रहरी नायव उपरीक्षक तिलक भारतीलाई दरबारमार्ग वृत्त प्रमुखबाट हटाएको छ भने प्रहरी निरीक्षक लक्षण सिंह ठकुरी र प्रहरी नायव निरीक्षक चन्द्रबहादुर भण्डारीलाई निलम्बन गरी हैदसम्मको कारबाही गर्न सिफारिस गरेको छ ।