काठमाडौं, २१ भदौ । लुम्बिनी विकास कोषका उपाध्यक्ष डा: ल्हारक्याल लामाले लुम्बिनी बनाउन आफू आएको भन्दै सहयोग गर्न सबैसँग आग्रह गरेका छन् । लुम्बिनी आफ्नो धार्मिक आस्थाको धरोहर भएको भन्दै उनले स्थानीय, बुद्धिजीवी, पत्रकार र अन्य विभिन्न संघसंस्थालाई समेत साथ र सहयोग गर्न अपिल गरेका हुन् ।

लुम्बिनीमा पत्रकारहरूसँगको भेटघाटमा उनले भने, ‘मेरो धार्मिक आस्थाको ठाउँ हो लुम्बिनी, इतिहास बनाउन सक्छु भनेर आएको छु । मायादेवीको कसम खाएर भनेको छु, लुम्बिनीमा लिन होइन दिन आएको छु ।’

उपाध्यक्ष लामाले लुम्बिनी गुरुयोजना आफ्नो कार्यकालमा पूरा गर्ने प्रतिबद्धता जनाए ।

उनले आफ्नो कार्यकालमा गुरुयोजना सम्पन्न गर्ने र मायादेवी मन्दिर निर्माण गर्ने उद्देश्य रहेको बताए । मायादेवी नयाँ डिजाइन र आकर्षक बनाउनुपर्ने उनको भनाइ छ ।

गुरुयोजनाको बाँकी काम, बुद्ध सर्किट निर्माण, रामग्राम, तिलौराकोट र देवदहको पुरातात्विक क्षेत्रको संरक्षण र विकासका लागि काम गर्ने गरी आफू आएकाले सहयोग गर्न पत्रकारहरूसँग उपाध्यक्ष डा। लामाले आग्रह गरे । ‘म लुम्बिनी बनाउन लड्छु, जुध्छु, भिड्छु तर, नैतिकता गुमाउँदिन’ उनले भने । उनले लुम्बिनी गुरुयोजनाका सम्बन्धमा र कोषको कामका बारेमा विभिन्न प्रश्न र गुनासाहरू उठेको बताउँदै त्यसलाई सम्बोधन गर्ने गरी अगाडि बढ्ने प्रतिबद्धता जनाए ।

संविधानसभा सदस्य, पूर्व अर्थ राज्यमन्त्री समेत रहेका डा। लामाले आफ्नो क्षमतालाई लुम्बिनी बनाउन खर्च गर्ने बताए । उनले आफूले जीवन नै बुद्ध धर्मका लागि अर्पण गरेको बताउँदै बाँकी रहेको जीवन सत्कर्ममा लगाउने गरी काम गरेर देखाउन आफू लुम्बिनीको उपाध्यक्ष बनेको बताए ।

विश्वका विभिन्न मुलुकबाट लुम्बिनी आउन चाहनाहरूलाई अनुकूल वातावरण बनाउने बताए । उनले लुम्बिनीमा बौद्ध धर्म गुरुहरूको मोलुम ९पूजा० जस्ता धार्मिक गतिविधि बढाएर बौद्ध पर्यटकहरूलाई आकर्षित गर्ने योजना रहेको सुनाए । ‘यो वर्ष मोलुम ९पूजा० का कार्यक्रमहरू तय भइसकेको छ’ उपाध्यक्ष लामाले भने ।

रामग्राम र तिलौराकोटमा पनि पूजा, ध्यान र बत्ती बाल्ने ठाउँ तुरुन्तै निर्माण गर्ने उनले बताए । धार्मिक कार्यक्रमलाई लुम्बिनीमा बढाउने गरी योजना बनाइएकोसमेत उनले बताए । धार्मिक गतिविधिसँगै पर्यटकहरूको बसाइ लम्बिने उनको विश्वास छ ।

उपाध्यक्ष लामाले रूपन्देही, कपिलवस्तु र नवलपरासीमा रहेका बौद्ध क्षेत्रको विकासका लागि दीर्घकालीन योजना बनाएको बताए । बौद्ध क्षेत्रको विकासका लागि आवश्यक रकम जुटाउन विश्व समुदायमा पुग्ने उनको भनाइ छ ।