काठमाडौं, १९ भदौ । ६० किलो सुन तस्करी प्रकरणमा थप एक आरोपित पक्राउ परेका छन् । नेपाल प्रहरीको केन्द्रीय अनुसन्धान ब्युरो ९सीआईबी०को टोलीले भारतबाट सुमन खरेललाई नियन्त्रणमा लिएको हो ।
अनुसन्धानका लागि खरेललाई थुनामा राख्न अदालतबाट म्याद थपको प्रक्रिया अघि बढाइएको प्रहरी प्रवक्ता एवं डीआईजी कुबेर कडायतले जानकारी दिए ।
चिनियाँ नागरिकले तस्करी गरेको सुन खरेलले नेपालमा व्यवस्थापनको काम गर्ने गरेको अनुसन्धानमा संलग्न प्रहरी अधिकारीको भनाइ छ ।
खरेल पक्राउसँगै केही नयाँ तथ्य खुल्ने सीआईबीको अपेक्षा छ । चिनियाँ र बेल्जियन नागरिक दावा छिरिङ पक्राउ परेलगत्तै उनी भारत भागेको खुलको छ ।
उनीसहित सुन प्रकरणमा पक्राउ पर्नेको संख्या २७ पुगेको छ । सीआईबीका अधिकारी हङकङ र भारतमा समेत पुगेर सुन तस्करीमा जोडिएका व्यक्तिबारे अनुसन्धान गर्दै छन् । भारत पुगेका सीआईबीका डीएसपी धर्मराज भण्डारीको नेतृत्वको टोलीले खरेललाई पक्राउ गरेर नेपाल पठाएको हो ।
सीआईबीकै एसएसपी दिनेश आचार्यलाई हङकङ पठाइएको छ ।
गएको साउन २ गते त्रिभुवन अन्तर्राष्ट्रिय विमानस्थलको भन्सार जाँचपास भएर बाहिरिएको ६० किलो सुन राजस्व अनुसन्धान विभागको टोलीले सिनामंगलबाट बरामद गरेको हो ।
साउन २१ देखि सीआईबीले सो प्रकरणको अनुसन्धान गरिरहेको छ । संगठित तस्करी मुद्दामा अनुसन्धान गरिँदै छ । यसको अनुसन्धान गर्न सीआईबीसँग अब ११ दिन मात्र बाँकी छ ।
थप अनुसन्धान गर्न मिल्ने गरी जिल्ला सरकारी वकिल कार्यालय काठमाडौंमा प्रतिवेदन बुझाउने तयारी रहेको सीआईबी स्रोतको भनाइ छ । स्रोतका अनुसार अर्को हप्ताको सुरुआतमै अनुसन्धान प्रतिवेदन बुझाउने तयारी छ ।
सीआईबीले पक्राउ गरेका दावासँग विभिन्न कारणले ‘कनेक्सन’मा रहेका नेपालीमाथि समेत अनुसन्धान थालिएको छ । सुन तस्करी प्रकरणमा नजोडिए पनि दावासँग सम्बन्ध देखिएपछि सीआईबीले सोमबार पूर्वउपराष्ट्रपति नन्दबहादुर पुनका छोरा एवं अनेरास्ववियु क्रान्तिकारीका महासचिव दिपेश पुनको कागजी बयान गरेको छ ।
चिनियाँ गिरोहले तस्करी गरेर काठमाडौं भित्र्याएको सुन भैरहवा नाका हुँदै भारत पुर्याइने गरेको अनुसन्धानमा संलग्न प्रहरी अधिकारीको जिकिर छ ।
असार ९ गते सशस्त्र प्रहरी बलको टोलीले रुपन्देहीबाट बरामद गरेको दुई किलो सुन समेत चिनियाँ समूहले नै नेपालमा भित्र्याएको आशंका प्रहरीले गरेको छ ।
नेपालबाट भारततर्फ जाँदै गरेको बा१२च ३८२० नम्बरको कारबाट सुनसहित दाङको घोराहीका हुमानन्द गिरी पक्राउ परेका थिए । रुपन्देही प्रहरीले सो प्रकरणमा समेत संगठित तस्करी मुद्दामा अनुसन्धान गरेको थियो ।
प्रतिक्रिया दिनुहोस्