विरगंज १५ भदौ ।मधेश प्रदेशको रौतहट जिल्लाको को सदरमुकाम गौर बजार शुक्रबार जलमग्न भएको छ । शुक्रबार दिउँसो केही बेर परेको पानीले गौर बजार जलमग्न भएको हो । नेपाल–भारत सीमाक्षेत्रमा भारतले एकतर्फी रुपमा लगाएको बाँधका कारण जमेको पानीले गौर बजार जलमग्न भएको स्थानीयले बताएका छन् ।

सडकमा पानी जमेपछि साना–ठूला यातायाताका सवारीसाधन र मानिसलाई हिँडडुलमा पनि समस्या भएको थियो । गौर बजारमा ढल बनाए पनि बाँधका कारण पानीले निकास नपाउँदा बर्षेनि सदरमुकाम गौर डुबानमा पार्दै आएको छ । दिउँसो ४० मिनेट जति वर्षा भएपछि गौर बजार जलमग्न भएको प्रमुख जिल्ला अधिकारी धर्मेन्द्रकुमार मिश्रले बताए ।

‘पानीको निकास नभएकै कारणले समान्य पानी पर्दा पनि जलमग्न र डुबानमा पार्दै आएको छ,ु उनले भने, ‘भारतीय सीमा क्षेत्रमा बाँध र पानीको निकास नहुँदा समस्या हुने गरेको छ ।’ गौरको पूर्वमा वाग्मती र पश्चिम क्षेत्रमा लालबकैया नदी पर्छन् । बर्खाको बेला दुबै नदीमा बाढी आउँछ । त्यही पानी गौरमा प्रवेश गर्दा डुबान हुने गरेको छ ।