काठमाडौं, १० भदौ । नेपाल एयरलाइन्सले भैरहवास्थित गौतमबुद्ध क्षेत्रीय अन्तर्राष्ट्रिय विमानस्थलबाट हङकङ र दिल्ली उडान गर्ने भएको छ ।
निगमले काठमाडौलाई ट्रान्जिट बनाएर हङकङ र दिल्ली उडान गर्न लागेको हो । हाल निगमले मलेसिया—भैरहवा उडान गर्दै आइरहेको छ । निगमले प्रत्येक मंगलबार भैरहवाबाट हङकङ र दिल्ली उडान गर्नेछ ।
निगमले हरेक मंगलबार भैरहवा–हङकङ, भैरहवा–दिल्ली उडान गर्ने लागेको हो । उक्त उडान भदौ १२ गतेदेखि उडान सुरु हुनेछ ।
“मंगलबार बिहान ८ः३० बजे भैरहवाबाट उडेको जहाज काठमाडौंमा ९ बजे अवतरण हुनेछ,” उनले बाह्रखरीसँग भने, “त्यसपछि हङकङ जाने यात्रु हङकङ जाने फ्लाइटमा चढ्नेछन् भने दिल्ली जाने यात्रु दिल्लीको फ्लाइटमा जानेछन् ।”
अहिले निगमले मलेसियाको क्वालालम्पुर–भैरहवा उडान गर्दै आइरहेको छ ।
निगमको न्यारोबडी जहाज सोमबार काठमाडौंबाट मलेसिया जान्छ । उक्त जहाज मंगलबार मलेसियाबाट भैरहवामा ल्यान्ड हुन्छ । मलेसियाबाट आएका यात्रुलाई भैरहवामा अवतरण गराएपछि भैरहवाबाट हङकङ र दिल्ली जाने यात्रुलाई लिएर जहाज काठमाडौंको त्रिभुवन अन्तर्राष्ट्रिय विमानस्थलमा ल्यान्ड गर्छ । यहाँबाट हङकङ र दिल्लीको निगमकै उडानमा यात्रुलाई पठाइने निगमका प्रवक्ता रमेश पौडेलले बताए ।
यसअघि, निगमले जेठ २९ गतेदखि मलेसियाको क्वालालम्पुर–भैरहवा उडान सुरु गरेको थियो ।
टिकट बुकिङ खुला
निगमले भैरहवा–हङकङ, भैरहवा–दिल्ली उडानको लागि टिकट खुला गरेको छ । याुत्रले सोमबारबाट उक्त क्षेत्रमा उडानको लागि टिकट लिन सक्ने निगमका प्रवक्ता पौडेलले जानकारी दिए ।
गौतमबुद्ध विमानस्थल विमानस्थल सञ्चालनमा महत्वपूर्ण भूमिका खेल्ने प्रवक्ता पौडेलले जानकारी दिए ।
“भैरहवा विमानस्थल सञ्चालनको लागि निमगले आफ्नो दायित्व सम्झेर उडान सुरु गरेको हो । हाम्रो यो प्रयासले विमानस्थल सञ्चालनमा महत्वपूर्ण भूमिका खुल्छ भन्ने विश्वास समेत लिएका छौँ ।”
साथै, पश्चिमी क्षेत्रका यात्रुलाई सहज हुने उनको भनाइ छ ।
“भैरहवाबाट हङकङ उडान गर्दा विशेष गरेर पश्चिम नेपालका यात्रुलाई समेत हुन्छ भन्ने हाम्रो विश्वास छ । यात्रुलाई समय र पैसाको बचत हन्छ,” पौडेलले भने ।
प्रतिक्रिया दिनुहोस्