काठमाडौं, ७ साउन । बालुवाटारस्थित सरकारी जग्गा प्रकरणमा आफ्नो कुनै स्वार्थ नरहेको पूर्व प्रधानमन्त्री डा। बाबुराम भट्टराईले कागज गरेका छन्। प्रहरीको केन्द्रीय अनुसन्धान ब्यूरोले उनलाई प्रतिवादी नबनाए पनि अनुसन्धानका क्रममा कागजात गराएको थियो।
उक्त मिसिल अहिले जिल्ला सरकारी वकिलको कार्यालयमा छ। आज भोलि नै अदालतमा दायर हुनेछ। सरकारी कीर्ते र संगठित अपराधको कसुमा २८६ जनालाई प्रतिवादी बनाइएको छ। त्यसमध्ये केहीलाई भने जग्गा फिर्ताको प्रयोजनका लागि मात्रै प्रतिवादी बनाइएको छ।
चार पूर्वमन्त्रीहरुलाई प्रतिवादी बनाउँदा मुख्यसचिव र पूर्व प्रधानमन्त्रीहरुलाई भने कागज गराएर छाडिएको छ।
सीआईबी समक्ष बाबुराम भट्टराईले गरेको कागज यस्तो छः
यो प्रकृयागत रुपमा भूमि व्यवस्था मन्त्रालयबाट उठी आएको प्रस्ताव मन्त्री परिषदमा पेश भई मन्त्री परिषदबाट सामाजिक समितिमा पठाईएकोमा सामाजिक समितिको सुझाव अनुसार मन्त्री परिषदले प्रस्तावमा लेखिए बमोजिम गर्न स्वीकृती दिएको हो ।
सम्पुर्ण विधि प्रकृया पुरा गरेर विधिवत रुपमा मन्त्री परिषदमा पेश भएको प्रस्ताव उपर छलफल भई सामुहिक रुपमा गरिएको निर्णय हो। म करिब १८ महिना नेपालको प्रधानमन्त्री पदमा बहाल रहेको अवस्थामा हजार भन्दा बढी प्रस्तावहरु मन्त्री परिषदमा पेश भए होलान। सबै प्रस्तावको प्राविधिक पक्ष याद हुने कुरा भएन।
मन्त्री परिषदको कार्यालयमा रहेको अभिलेखबाट अवगत हुन सक्छ । मन्त्री परिषदको निर्णय सरकारी जग्गा व्यक्ति बिशेषलाई दिने भन्ने होईन, उल्लेखित प्रस्ताव मन्त्री परिषदको सामाजिक समितिमा छलफल गरी पेश गर्न पठाएकोमा उक्त समितिको मिति २०६९ असोज १४ मा बसेको बैठकले पेश गरे अनुसार “पुनः नापी बमोजिम नेपाल सरकार, समरजंग कम्पनीको नाममा दर्ता भएको जग्गाको दर्ता सच्याई साविक लगत बमोजिम श्री पशुपती टिकिन्छा गुठीको नाममा दर्ता गर्न स्वीकृती दिने” भन्ने मन्त्री परिषदबाट निर्णय भएको हो।
मन्त्री परिषदमा पेश भएको प्रस्तावमा साविक लगत बमोजिम भन्ने व्यहोरा उल्लेख भएकोले सोही अनुसार निर्णय भएको हो। मन्त्री परिषदमा निर्णयार्थ पेश हुने सम्बन्धित मन्त्रालयको प्रस्ताव मुख्य सचिव मार्फत मन्त्री परिषदमा पेश हुने भएकोले यसरी पेश भएको प्रस्तावमा कुनै किसिमको कानूनी वा अन्य त्रुटी छैन भन्ने विश्वासमा प्रस्ताव उपर निर्णय गरिन्छ।
यी निर्णयहरुमा मेरो व्यक्तिगत र पारिवारीक स्वार्थ, चाहना वा चासो जोडिएको विषय होईन। मेरो सार्वजनिक जीवन र नैतिक आचरण निष्कलंक रहि आएको छ। यसरी चर्चामा आएको प्रस्तुत विषयमा मेरो कुनै किसिमको बदनियत वा गलत मनशायले गरिएको निर्णय होईन।
प्रतिक्रिया दिनुहोस्