काठमाडौं, २३ माघ । राष्ट्रपति विद्यादेवी भण्डारी र माओवादी केन्द्रका अध्यक्ष प्रचण्डबीच गोप्य सहमित भएको छ । राष्ट्रपतिमा पुनः दोहोरिने भण्डारीले इच्छा व्यक्त गर्दै केही दिनदेखि विभिन्न चरणमा छलफल चलाउनु भएको छ ।
छलफलका क्रममा प्रचण्ड भण्डारीलाई दोहोर्याउन सहमत भएको स्रोत बताएको छ । तर, त्यसको लागि आफूलाई पार्टी अध्यक्ष बनाउन र उपराष्ट्रपतिमा फेरि पनि नन्दबहादुर पुनलाई दोहोर्याउने सर्त समेत अध्यक्ष प्रचण्डले राखेको स्रोतले बतायो । प्रचण्डको उक्त सर्त भण्डारीले पनि स्वीकार गरेको बताएको छ । राष्ट्रपति भण्डारीले एमाले अध्यक्ष केपी शर्मा ओलीसँग भएको छलफलमा प्रचण्डलाई एकीकृत पार्टीको अध्यक्ष बनाउनु पर्ने बताएको स्रोतका दाबी छ ।
राष्ट्रपतिमा दोहोर्याउन मनस्थितिमा भएपनि प्रचण्डलाई पार्टी अध्यक्ष बनाउन तयार नभएका ओली झस्केको स्रोतको दावी छ। ओली प्रचण्ड सहमत भएकोमा खुशी भएका त छन् तर अध्यक्ष बनाउनु पर्ने बाध्यता आउनेमा डराएका स्रोतले बतायो । राष्ट्रपतिले नै प्रचण्डलाई पार्टी अध्यक्ष बनाउनु पर्ने भन्दै लविङ गरेपछि ओली थप दवावमा पर्ने देखिन्छ ।
यो सहमतिले एमालेभित्र हलचल हुने देखिएको छ । वरिष्ठ नेता झलनाथ खनालले राष्ट्रपति हुने इच्छा व्यक्त गरिसक्नु भएको छ । उहाँले सार्वजनिक रुपमै बोल्दै आएको र त्यसको लागि लविङ गरिरहेका गर्नुभएको छ । यसमा अर्का नेता माधव कुमार नेपालले साथ दिनुभएको छ ।
पछिल्लो सहमतिले खनालको इच्छा पूरा नहुने देखिएको हो । खनाल र नेपाल दुबै नेताले प्रचण्डलाई अध्यक्ष बनाउनु पर्ने बताउँदै आएका छन् । तर राष्ट्रपति भण्डारीको पछिल्लो छलफल, भेटवार्ताले फेरि ओली र प्रचण्डलाई एक ठाउँमा ल्याउने देखिन्छ । यसले पार्टी एकतालाई सजिलो हुने देखिएको छ ।
प्रतिक्रिया दिनुहोस्