काठमाडौं, २२ माघ । प्रदेश नम्बर ६ मा मुख्यमन्त्रीको टुंगो राष्ट्रियसभा सदस्यको निर्वाचनपछि लाग्ने भएको छ।

वाम गठबन्धनका दुवै दल राष्ट्रियसभा निर्वाचनमा केन्द्रित भएकाले मुख्यमन्त्री छनोटको प्रक्रिया निर्वाचनपछि लाग्ने देखिएको हो।

वाम गठबन्धनबिच भएको सहमति अनुसार प्रदेश नम्बर ६ को मुख्यमन्त्री माओवादी केन्द्रले पाएको छ। प्रादेशिक सरकारको नेतृत्व गर्न धेरै आकांक्षी देखिएपछि माओवादी केन्द्रले त्यसको निर्णय गर्ने जिम्मेवारी प्रदेश कमिटीलाई दिएको छ। सहमतिको प्रयास असफल भएपछि माओवादीले निर्वाचनबाटै प्रदेशको संसदीय दलको नेता चयन गर्ने भएको हो।

‘मुख्यमन्त्रीका लागि पूर्व ऊर्जामन्त्री महेन्द्रबहादुर शाही र नरेश भण्डारीबीच मुख्य प्रतिस्पर्धा छ।

शाही पूर्व सांसद संगै माओवादीका छैटौं डिभिजनका प्रमुख थिए। उनी पार्टी अध्यक्ष पुष्पकमल दाहाल प्रचण्डका निकट मानिन्छन्। शाहीलाई मुख्यमन्त्रीको बलियो प्रत्यासी मानिएको छ।

उता भण्डारी भने एकता प्रक्रियाबाट माओवादीमा प्रवेश गरेका हुन् । केन्द्रीय राजनीतिमा नेता रामबहादुर थापाका नजिक रहेका भण्डारी मुख्यमन्त्री पाउने आश्वासनपछि प्रदेशसभा निर्वाचनमा भाग लिएका थिए।