काठमाडौँ ३० असार । नेपाल कम्युनिस्ट पार्टीका महासचिव नेत्रविक्रम चन्द विप्लवले बालुवाटार पुगेर सीता दाहालप्रति श्रद्धाञ्जली अर्पण गरेका छन् ।

सो क्रममा विप्लवले पत्नी वियोगमा रहेका प्रधानमन्त्री पुष्पकमल दाहाल प्रचण्ड तथा छोरीहरु रेणु र गङ्गा दाहालप्रति समवेदना प्रकट गरेका थिए ।
विप्लवको साथमा नेकपाका प्रवक्ता खड्गबहादुर विश्वकर्मा प्रकाण्ड, सन्तोष बुढामगर लगायत स्थायी समितिका सदस्यहरूको उपस्थिति रहेको थियो ।
समाजवादी मोर्चा गठन भएपछि विप्लव समुहको प्रचण्डसँग निकटता बढ्दै गएको छ । प्रचण्डको विप्लवसँगको निकटतालाई भने वर्षामान पुन र जनार्दन शर्माले आफूहरु विरुद्धको हथकण्डाका रुपमा अथ्र्याउँदै आएका छन् ।

यसैबीच कलाकार अन्जु पन्तले भोजको घरमा जानुभन्दा शोकको घरमा जानु जाति भन्दै स्व. सीता दाहालप्रति श्रद्धान्जली अर्पण गर्न बालुवाटार पुगेको तस्वीर सार्वजनिक गरेकी छन् । उनले लेखेकी छन्। ‘भोजको घरमा जानु भन्दा शोकको घरमा जानु असल हो । सम्माननीय प्रधानमन्त्री पुष्पकमल दाहाल प्रचण्ड ज्यूकी जीवन-संगिनी सीता दाहालको निधनबाट पुगेको अपुरणीय क्षतिमा समवेदना ब्यक्त गर्दछु, यो विषम परिस्थितीमा शोक सन्तब्ध परिवारजन सबैमा धैर्यधारण गर्ने शक्ती परमेश्वरबाट प्राप्त होस् प्रार्थना गर्दछु । #AnjuPanta