काठमाडौँ, ११ जेठ । नक्कली शरणार्थी प्रकरणका आरोपितको बयानमा तत्कालीन प्रधानमन्त्री केपी शर्मा ओलीको सचिवालयका केही व्यक्तिसहित तत्कालीन गृहसचिव तथा हालका अख्तियार प्रमुख प्रेमकुमार राईको पनि नाम मुछिएको छ । अख्तियार प्रमुख आयुक्त राईको गाडीमा तीन करोड रूपैयाँ राखिदिएको बयान आरोपितले दिएका छन् ।

तर, प्रहरीले यसतर्फ कुनै अनुसन्धान नै गरेन । तत्कालीन प्रधानमन्त्री ओलीको सचिवालयका केही व्यक्ति र राईमाथि पनि नैतिक प्रश्न उब्जिएको छ । तर, राई भने नक्कली भुटानी शरणार्थी प्रकरणमा आफ्नो कुनै संलग्नता नभएको दाबी गर्छन् ।

आफू कुनै पनि हालतमा संलग्न नभएको केसमा जबरजस्ती नाम जोडिएकाले कुनै नैतिक प्रश्न नउठ्ने उनको तर्क छ । “मैले केही नगरेको, नजानेको, नबुझेको र नबोलेको मान्छेमाथि कसरी नैतिक प्रश्न आउँछ ?” उनी भन्छन्, “कुनै पनि बिचौलियाले के के बोले ? किन बाहिर ल्याइयो मैले जान्ने कुरा भएन । हचुवाका भरमा बिचौलियाले कहिले तीन करोड, कहिले दुई करोड र कहिले एक करोड दिएको भनेको छ । गाडीको डिकीमा राखिदिएको भन्छ रे, अनि डिक्कली खुलै हुन्छ ? त्यत्तिकै लगेर कसैले करोड करोड राख्छ ?” हिमालय टाइम्सबाट