दाङ ८ जेठ । अलौकिक मनोवैज्ञानिक उपचारका नाममा ठगी गर्दै हिँड्ने कथित ज्योतिषी सिमान्त केसीद्वारा तुलसीपुरमा आयोजना गरिएको ४ दिने कार्यक्रमलाई प्रहरीले रोक लगाएको छ । दाङ लगायत छिमेकी जिल्लाबाट ३ सय बढी मानिस जम्मा गरेर आइतबार बिहानैदेखि तुलसीपुर उपमहानगरपालिका–६ स्थित त्रिसिद्धेश्वरी मन्दिरमा भेटघाट गरिरहेका बेला प्रहरीले त्यस्तो कार्यक्रममा रोक लगाएको हो ।

हात, अनुहार हेरेर, शरीर छामेर रोग निको पार्ने भन्दै भ्रम फैलाइएको पाइएपछि उक्त काममा रोक लगाएको इलाका प्रहरी कार्यालय तुलसीपुरका प्रमुख डिएसपी पुष्पराज मल्लले बताए ।

‘प्रतिव्यक्ति एक हजार रुपैयाँ उठाएर उपचार गर्ने गलत प्रचारप्रसार गरिएको पाइएपछि त्यस्तो भेटघाट र कथित उपचारलाई रोकिएको हो,’ उनले भने, ‘उपचारका लागि भन्दै सल्यान, रोल्पा र बाँकेबाट समेत मानिस आएका थिए ।’ कतिपय अघिल्लो दिन नै तुलसीपुरमा आएर होटलमा बसेको पाइएको छ ।

उनीहरूले आइतबारदेखि चार दिनसम्म कार्यक्रम गर्ने तयारी गरिरहेका बेला रोकिदिएको डिएसपी मल्लले बताए । ‘मानिस अनावश्यक भ्रमको पछि लागेको देखियो । जति खर्च गर्दा पनि रोग निको भएको छैन, हात हेरेर उपचार हुन्छ भने किन नगर्ने भन्ने मानिस भेटिए,’ उनले भने, ‘यसरी समाजमा गलत भ्रम फैलाउन पाइँदैन । मानिसमा पनि चेतनाको कमी भयो । अहिलेको जमानामा हेरेका भरमा उपचार कसरी हुन्छ रु’

प्रशासनको अनुमति नलिएर उपचारका नाममा मानिसको भीडभाड गरेको पाइएपछि उक्त कार्यक्रममा रोक लगाएको निमित्त जिल्ला प्रहरी प्रमुख डिएसपी राजनकुमार गौतमले बताए । ‘प्रशासनलाई कुनै पनि जानकारी नदिएर मानिसको भीड गरेको देखियो,’ उनले भने, ‘उपचारका नाममा अनावश्यक भ्रम फैलाउने गरेको पाइएको छ । त्यसलाई हामीले रोकेका छौं ।’

प्रशासनको अनुमति नलिएर गलत काम गर्न थालेको पाइएपछि रोकेको प्रमुख जिल्ला अधिकारी सुशील वैद्यले बताए । मानिसलाई भ्रममा पारेर उपचारको हल्ला फैलाइएको पाइएपछि रोक्न आदेश दिएको उनले बताए ।