काठमाडौं ३१ बैशाख । संसदको संसदीय सुनुवाइ समितिमा संसदमा रहेका १२ दलमध्ये जम्मा ६ दलका सांसदहरू हुने भएका छन्।
आइतबार बसेको कार्यव्यवस्था परामर्श समितिको बैठकले विभिन्न दलबाट समितिमा रहने सांसदहरूको संख्या टुंगो लगाएको हो।
नेकपा एमाले का प्रमुख सचेतक पदम गिरीका अनुसार सुनुवाइ समितिमा नेपाली कांग्रेस र एमालेका समान ५–५ जना सांसद हुने भएका छन्।
माओवादी केन्द्रबाट २, राष्ट्रिय स्वतन्त्र पार्टी र जनता समाजवादी पार्टीले १–१ सदस्य पाएका छन्।
तीन दलका शीर्ष नेताहरूबीच आजै संसदीय सुनुवाइ समितिको सभापति नेपाली कांग्रेसका सांसद हुने सहमति गरेका छन् ।
समितिले संवैधानिक अंगका पदाधिकारी र विभिन्न देशका राजदूतहरूको नियुक्तिका लागि भएको सिफारिसमा सुनुवाइ गर्छ।
सिफारिस संसदीय समितिबाट अनुमोदन भएपछि सम्बन्धित पदमा नियुक्ति हुन्छ।
संवैधानिक परिषद्ले प्रधानन्यायाधीशमा हरिकृष्ण कार्कीलाई सिफारिस गरेपनि सुनुवाई बांकी रहेको छ । कायममुकायम प्रधानन्यायाधीश कार्की संसदीय सुनुवाइ समितिबाट अनुमोदन भएपछि मात्र प्रधानन्यायाधीश नियुक्त हुने छन्।
प्रतिक्रिया दिनुहोस्