काठमाडौँ, १८ वैशाख । एसिया कप पुग्ने लक्ष्यसहित एसिसी प्रिमियर कपको फाइनलमा आज नेपालले यएईसँग खेल्दै छ । एसिया कप खेल्न एक जितबाट टाढा रहेको नेपालले आज युएईको चुनौती पन्छाउनु पर्ने छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहान ९ बजेदेखि फाइनल खेल सुरू हुने छ । दुई दिन यतादेखि काठमाडौँ उपत्यकामा अपरान्हपछि लगातार वर्षा हुँदै आएको र आज पनि वर्षाको सम्भावना रहेकाले फाइनल खेल प्रतिकूल मौसमका कारण प्रभावित हुन सक्ने छ ।

एसिसी मेन्स प्रिमियर कपअन्तर्गत नेपाल र युएईबीचको खेल बहुप्रतिक्षित हो । पछिल्लो समय एसोसिएट राष्ट्रमा यी दुईबीचको भिडन्तलाई ‘एल क्लासिको’को रूपमा पनि ब्याख्या गरिन्छ । यो खेलमा जित हात पार्ने टोलीले क्रिकेटका पावर हाउस भारत, पाकिस्तान जस्ता देशसँग प्रतिस्पर्धा गर्ने मौका पाउने छ ।

यी दुईबीच भएको पछिल्लो ४ भेटमा नेपालले तीन जित हात पार्दा युएईले एकमात्र जित हात पारेको छ । नेपालले एक महिनाअघि टियु मैदानमै विश्व क्रिकेट लिग–२ मा युएईलाई नै हराउँदै एकदिवसीय मान्यता जोगाएको थियो भने विश्वकप छनोटमा स्थान बनाएको थियो ।

जारी प्रतियोगितामा नेपालले अपराजित रहँदै फाइनलसम्मको यात्रा तय गरेको हो । लिग–२ अन्तर्गत पछिल्लो पटक युएईसँग उसकै मैदानमा पराजय ब्यहोरे यताको ९ खेलमा नेपाल अपराजित छ । नेपाल सोही लयलाई निरन्तरता दिँदै एसिया कपमा स्थान बनाउने लक्ष्यमा हुने छ ।

एक महिनाअघि सम्पन्न विश्व क्रिकेट लिग–२ मा खराब प्रदर्शन गरेको युएईले विश्वकप छनोटको प्लेअफमा उत्कृष्ट प्रदर्शन गर्दै पुनरागमन गरेको छ । प्रशिक्षक मुदसर नजर आएयता टिमको प्रदर्शन फेरिएको छ । जारी प्रतियोगितामा पनि ५ खेलमा ४ जित हात पारेको युएईको पनि नजर उपाधिमा छ ।

वर्षाले खेल प्रभावित भएमा नतिजा के हुन्छ ?
मौसम पूर्वानुमान महाशाखाका अनुसार आज बिहानदेखि नै मौसम बदली भइ मध्यान्ह १२ बजेदेखि मेघगर्जनसहित पानी पर्ने सम्भावना छ ।

आज खेल हुन नसकेकमा भोलि (मंगलबार)लाई वैकल्पिक दिन राखिएको छ । फाइनलमा पानी परेर पूरै ओभर खेल्न नसक्ने अवस्था भएमा सुपर ओभर खेलाइने छ । सुपर ओभर पनि खेल्ने अवस्था नरहे एकदिवसीय वरीयतामा युएईभन्दा अघि रहेको नेपालले एसिया कपमा स्थान बनाउने छ ।

नेपाल एकदिवसीय वरीयताको १४औँ स्थानमा छ भने युएई नेपालभन्दा ५ स्थान तल छ । उपाधि जित्ने टोलीले एसिया कपमा सिधैँ भारत र पाकिस्ता नरहेको समूह ‘ए’मा स्थान बनाउने छ । समूह ‘बी’मा श्रीलंका, अफगानिस्तान र बंगलादेश छन् ।

एसिया कपको १३औँ संस्करण आगामी सेप्टेम्बरमा पाकिस्तानमा हुने छ ।