काठमाडौँ, १६ वैशाख । नेपालले एसिसी प्रिमियर कपको पहिलो सेमिफाइन खेलमा आज कुवेतसँग खेल्दै छ । खेल बिहान ९ बजे टियु क्रिकेट मैदानमा सुरू हुने छ । घरेलु टोली नेपाल समूह ‘ए’को विजेता र कुवेत समूह ‘बी’को उपविजेताको रूपमा सेमिफाइनलमा स्थान बनाएका हुन् ।

नेपाल कुवेतलाई हराउँदै फाइनलमा स्थान पक्का गर्न चाहन्छ । तर, कुवेतदेखि भने नेपाल सजग छ । कुवेतलाई समूह चरणको अन्तिम खेलमा हङकङलाई ३० रनले हराउँदै सेमिफाइनलमा स्थान बनाएको थियो । उक्त खेलमा कुवेतले मूलपानी मैदानमा २७२ रन बनाएको थियो । कुवेत पनि घरेलु टोली नेपाललाई स्तब्ध पार्दै फाइनलमा पुग्न चाहन्छ ।

नेपाली सिनियर टोलीले एकदिवसीय प्रारूपको खेलमा कुवेतसँग ११ वर्षपछि प्रतिस्पर्धा गर्न लागेको हो । पछिल्लो पटक नेपाल र कुवेतबीच सन् २०१२ को अक्टोबरमा एसिसी ट्रफीको खेलमा प्रतिस्पर्धा भएको थियो ।

युएईमा भएको समूह चरणको उक्त खेलमा नेपाल ४ विकेटले पराजित भएको थियो । पहिले ब्याटिङ गरेको नेपालले ४ विकेटको क्षतिमा २८० रन जोडेको थियो । नेपालले दिएको २८१ रनको लक्ष्य कुवेतले ६ विकेटको क्षतिमा पूरा गरेको थियो । नेपालविरूद्ध कुवेतका तीन ब्याटरले अर्धशतक प्रहार गरेका थिए । प्रतियोगिताको फाइनलमा नेपालले युएईसँग बराबरी खेल्दै संयुक्त रूपमा ट्रफी उचालेको थियो ।

उता आजै दोस्रो सेमिफाइन खेलमा युएई र ओमानबीच मूलपानीमा प्रतिस्पर्धा हुनेछ । योसँगै मूलपानी मैदान विश्वको २१६औँ एकदिवसीय मान्यता प्राप्त मैदान बन्नेछ ।

कतारविरूद्ध विश्राम दिएका तीव्र गतिका बलर करण केसी टोलीमा फर्किँदा गुलशन झा बेन्चमा बस्ने उच्च सम्भावना देखिन्छ । गुलशनको बलिङ त्यति धेरै प्रभावकारी नहुँदा करणलाई नै पहिलो रोजाइमा निरन्तरता दिने छ ।

ज्ञानेन्द्र मल्ल र प्रतिश जिसी आज पनि बेन्चमा बस्ने सम्भावना छ । नेपालका ओपनर आसिफ शेख र कुशल भुर्तेल यस प्रतियोगितामा चलेका छैनन् । उनीमाथि नेपालले थप विश्वास गर्ने हुँदा ज्ञानेन्द्र बेन्चमा नै बस्ने सम्भावना छ । अन्य खेलाडी परिवर्तन गर्ने सम्भावना भने छैन ।

नेपालको ब्याटिङ १० नम्बरसम्म छ । त्यसैले सबै ब्याटरले जिम्मेवारी प्रदर्शन गर्नुपर्ने हुन्छ । भीम सार्की, रोहित पौडेल र कुशल मल्लको प्रदर्शन निकै महत्वपूर्ण हुने छ । उता स्पिनर सन्दीप लामिछाने नेपालका प्रमुख हतियार हुन् ।

उता कुवेतको तुलनात्मक रूपमा बलिङ र फिल्डिङ कमजोर रहेपनि ब्याटिङमा भने सानदार प्रदर्शन गर्दै आएको छ । ब्याटिङ नै कुवेतको प्रमुख हतियार हो । कुवेती ब्याटर बिस्फोटक ब्याटिङमा प्रभाव जमाउँदै आएका छन् ।

आदनान इद्रिस, रविजा सानदरवान, परविन्दर कुमार, मोहम्मद अस्लाम, मित भावसर, शिराज खान, उस्मान पटेल र सैयद मोनिब कुवेतका ब्याटर हुन् । जसमा मोनिब, परविन्दर र इद्रिस घातक बन्न सक्छन् ।