काठमाडौँ, १४ वैशाख । एसीसी प्रिमियर कप क्रिकेटअन्तर्गत समूह ए अन्तर्गतको अन्तिम खेलमा नेपालले खराब सुरूवात गरेको छ ।

कीर्तिपुरस्थित त्रिभुवन विश्वविद्यालयको क्रिकेट मैदानमा टस हारेर पहिले ब्याटिङ गरेको नेपालले खराब सुरूवात गरेको हो । यो समाचार तयार पार्दासम्म नेपालले ६ ओभरमा २ विकेट गुमाएर २६ रन बनाएको छ ।

आजको खेलमा पनि सदाझैँ ओपनर चल्न सकेनन् । दुवै ओपनर कुशल भुर्तेल २ रनमा आउट हुँदा भीम सार्कीले ६ रन बनाए । यस्तै, आशिफ शेख ५ तथा कप्तान रोहित पौडेल १२ रनमा खेलिरहेका छन् ।

नेपालले कतारलाई पराजित गर्दै समूहको विजेता बन्न चाहन्छ । नेपालले यसअघि खेलेको तीन खेलमा दुईमा जित र एकमा अंक बाँड्दै पाँच अंकका साथ अंक तालिकाको दोस्रो स्थानमा छ ।

नेपालले पहिलो खेलमा मलेसियालाई छ विकेटलले पराजित गरेको थियो भने दोस्रो खेलमा ओमानलाई ८४ रनले हराएको थियो । तेस्रो नेपालले साउदी अरेबियासँग वर्षाको कारण अंक बाँडेको थियो ।

आजको खेलमा जित हासिल गरे नेपाल समूह ‘ए’ को विजेता बन्दै सेमिफाइनल खेल्नेछ । कतार तीनै खेलमा जितविहीन हुँदै प्रतियोगिताबाट बाहिरिसकेको छ । कतारको भने यस खेल प्रतिष्ठाको लागि मात्र हुनेछ ।