काठमाडौं, १० बैशाख । तीन वटा क्षेत्रमा भएको प्रतिनिधि सभा सदस्यको उपनिर्वाचनको समय सकिएको छ। बारा क्षेत्र नम्बर २, चितवन क्षेत्र नम्बर २ र तनहुँ क्षेत्र नम्बर १मा उपनिर्वाचन भएको हो। यो उपनिर्वाचनमा गत मंसिरमा भएको निर्वाचनको भन्दा कम मत खसेको निर्वाचन आयोगले जनाएको छ। यद्यपि कति कम खसेको हो भन्ने विवरण आउन बाँकी छ।

तनहुँ–१ मा पनि केही कम मत खसेको छ। यहाँ मंसिरमा ५३ प्रतिशत खसेको थियो भने अहिले ५१ प्रतिशत खसेको निर्वाचन आयोगका प्रवक्ता सहसचिव शालिग्राम शर्मा पौडेलले जानकारी दिए। ‘हामी एक हप्तादेखि यहाँ छौं। अहिले कहीँ कतै पनि लाइन छैन,’ उनले भने, ‘काठमाडौंबाट आएका र विदेशबाट आएर हाल्न खोज्नेहरूलाई रोकेका छौं।’ बारा–२मा पनि साढे ४ बजेसम्मको विवरणअनुसार ५६ प्रतिशत मत खसेको छ। यो संख्या ६० प्रतिशतसम्म पुग्ने अनुमान गरिएको छ। यस्तै चितवन(२ मा भने मतदान जारी नै रहेको मुख्य निर्वाचन अधिकृत बासुदेव न्यौपानेले जानकारी दिए। ‘लाइनमा भएकाहरूले मतदान गर्न पाउने भएकाले मतदान भइरहेकै छ,’ उनले भने। साढे ४ बजेसम्म अन्दाजी ५५ प्रतिशत मत खसेको उनले बताए। गत मंसिरमा भने ७२ प्रतिशत मत खसेको उनले बताए।