काठमाडौं २५ चैत । नेकपा एकीकृत समाजवादीका तेस्रो वरियताका नेता मुकुन्द न्यौपानेले नेतृत्वलाई पीँध नभएको बाल्टीसँग तुलना गर्दै पार्टी छाडेको घोषणा गरेका छन्।

अध्यक्ष माधवकुमार नेपाल र नेता झलनाथ खनालपछिको वरियतामा रहेका न्यौपानेले चैत २५ गतेदेखि पार्टीको साधारण सदस्य समेत नरहेको घोषणा गरेका हुन्। आफूले गत माघमा पार्टीमा राखेको ३३ बुँदे फरक मतमा छलफल नभएको भन्दै उनले पार्टी त्यागेको उल्लेख गरेका छन्।

“अवस्तुवादी आत्मगत चिन्तनमा आधारित शास्त्रीय आख्यान पिलाउँदै हिंड्नु भनेको आफूलाई संधै पींध नभएको बाल्टीमा परिणत गर्नु हो, जति पटक इनारमा डुबाएर ताने पनि माथि आउँदा रित्तै हुन्छ,” न्यौपानेले भनेका छन्, “नेकपा एकीकृत समाजवादीका नेतृत्व पंक्तिका कतिपय  नेता र मातहत कमिटीका कतिपय कार्यकर्ताको हालत यस्तै छ।”
न्यौपानेले माघ २१ र २२ गतेको केन्द्रीय कमिटी बैठकमा आफ्नो धारणा सहित ३३ बुँदे फरक मत राखेकोमा अहिलेसम्म पनि छलफल नभएकोले भन्दै पार्टी सदस्य हुनुभनदा देशको असल नागरिक भएर बस्ने उचित हुने निष्कर्ष निकालेको बताएका छन्।

‘…म जस्तो विगत ५४ वर्षको राजनितिक जिवनमा यात्रा गरेको कम्यूनिष्ट कार्यकर्ता विधि, प्रक्रीया र सांगठनिक ढाँचा अनुरुप पार्टिको सदस्य भएर बस्तु भन्दा देशको असल नागरिक भएर बस्नु उचित हुनेछ भन्ने सोचका साथ लेनिनले १९१७ मा भनेका वाक्य स्मरण गर्दै भविष्य नभएको पार्टीको नेता हुन भन्दा सम्मानित नागरिक भएर जिउनु जिवनको लागि महत्वपूर्ण कुरा हो भन्ने अभिशाखलाई आत्मसाथ गर्दै म आजका मिति २०७९ साल चैत्र २५ गतेका दिन देखि यस पार्टीको साधारण सदस्य समेत तथा सम्पुर्ण पार्टि जिम्मेवारी परित्याग गरेको घोषणा गर्दछु।’ न्यौपानेले भनेका छन्।

पूर्व मन्त्री समेत रहेका न्यौपानेले भ्लाद्‌मिर लेनिनको भनाइ स्मरण गर्दै ‘भविष्य नभएको पार्टीमा बस्नु भन्दा सम्मानित नागरिक भएर जीउनु’ महत्त्वपूर्ण भएको जिकिर गरेका छन्।