काठमाडौँ, २४ चैत । बुद्ध एयरको जहाजभित्रै दुई यात्रु झगडा गरेको भिडियो यतिबेला सामाजिक सञ्जालमा भाइरल भएको छ ।

बुधबार साँझ विराटनगरबाट काठमाडौँ उडेको बुद्ध एयरको उडान नम्बर ७१० को जहाजमा दुई यात्रुबीच लफडा चलेको थियो । तर, लफडाको कारण भने पुरानो रहेको खुलेको छ । दुई यात्रुबीच जग्गाको कारोबारको विवादमा विमानभित्रै झगडा परेको खुलेको छ ।

उनीहरूमध्ये एक जनाले काठमाडौँमा जग्गा दिलाइदिने भनी बैना रकम लिएका रहेछन् । उनले भनेजस्तो जग्गा मिलाइदिन नसकेपछि विराटनगरमा जग्गा मिलाइदिने सर्तमा दुवै जना विराटनगर पुगेका थिए । तर, त्यहाँ पनि जग्गामा कुरा मिल्न नसकेपछि रकम दिने व्यक्तिले आफूलाई काठमाडौँ फिर्ता हुने भन्दै बुद्ध एयरको टिकट काटे । अर्का व्यक्तिले पनि अर्को उडानमा टिकट काटे ।

तर, बुधबार दुई उडानलाई एउटै उडानमा मर्ज गरी काठमाडौँ उडाइयो । अनि जग्गाका झगडालु एउटै विमानमा भेट भए । उनीहरू बस्ने सिट पनि सँगै पर्‍यो ‘९ए र ९बी’ मा । सुरूमा काठमाडौँ नजाने भनेका व्यक्ति आफूसँगै देखेपछि झगडा सुरू भएको थियो ।

उनीहरूबीच केहीबेर हात हालाहालकै अवस्था भएको थियो । अरू यात्रुले र विमान कर्मचारीले झगडा मिलाउन निक्कै मेहनत गर्नुपरेको थियो । पछि फ्लाइट एटेन्डेन्सले सिट फरक–फरक पारेर विमानभित्रको झगडा भने साम्य पारेका थिए ।

विमानस्थलमा झरिसकेपछि नेपाल उड्डयन प्राधिकरणले उनीहरूलाई विमानस्थल सुरक्षामा खटिएको प्रहरीलाई जिम्मा लगाएको थियो । झगडा गर्नेहरू दुर्गालाल श्रेष्ठ र विमलबाबु श्रेष्ठ हुन् ।

ती दुवै जनामाथि थप अनुसन्धानका लागि प्रहरी वृत्त गौशालामा पठाएको त्रिभुवन अन्तर्राष्ट्रिय विमानस्थल सुरक्षा कार्यालयका एसपी लालमणि आचार्यले जानकारी दिए ।

नागरिक उड्डयन प्राधिकरणका प्रवक्ता जनन्नाथ निरौलाले उनीहरूलाई गैरसैनिक हवाई ऐन, २०१५ अनुसार कारबाही गर्न प्रहरीलाई बुधबार नै बुझाएको बताए ।

उनीहरूलाई कुन कसुरमा अनुसन्धान अघि बढाउनेबारे प्रहरीले अध्ययन गरिरहेको छ ।