काठमाडौँ, २३ चैत । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफूहरू अहिले पनि पहिचानकै पक्षमा रहेको बताएका छन् । बुधबार पेरिसडाँडामा बसेको माओवादी पदाधिकारी बैठकलाई सम्बोधनका क्रममा प्रधानमन्त्रीसमेत रहेका उनले कोशी प्रदेश नाम राख्दा गल्ती हुन पुगेको बताए ।

“पूर्व १ नम्बर प्रदेश नामाकरणको विषयमा हामी पहिचानको अडानमै छौँ,” उनले बैठकमा ब्रिफिङ गर्दै भने, “त्यो प्रदेशमा रहनुभएका साथीहरूबाट कोशी नाममा निर्णय गर्ने बेला अडान लिन सक्नुभएन ।” उनले अहिले पनि माओवादी पहिचानको मुद्दामा तलमाथि नहुने बताए । “तर, म तपाईंहरूलाई के विश्वस्त गराउन चाहन्छु भने हाम्रो पार्टी अहिले पनि पहिचानको मुद्दामा तलमाथि हुँदैन र हुने छैन,” उनले त्यसक्रममा भने ।

गत फागुन १७ गते प्रदेश १ को नाम कोशी प्रदेश जुराउँदा प्रस्तावक रामबहादुर रानाले राखेको प्रस्तावको पक्षमा ८२ र विपक्षमा ४ मत परेको थियो ।

९३ सदस्यीय प्रदेश १ को प्रदेशसभामा मत विभाजनका क्रममा दुई तिहाइका लागि ६२ मत आवश्यक रहेकामा प्रस्तावको पक्षमा सत्तारूढ दलहरू नेकपा (एमाले), नेकपा (माओवादी केन्द्र) र राष्ट्रिय प्रजातन्त्र पार्टी तथा विपक्षमा नेकपा (एकीकृत समाजवादी)का ४ सदस्यले मतदान गरेका थिए ।

तर, पहिचान पक्षधरहरूले किरातसहितका नाम अघि सारेर आन्दोलन चर्काइरहेका बेला प्रचण्डले बैठकमा यो ब्रिफिङ गरेका हुन् । कोशीले पहिचान पक्षधहरूको भावनामा ठेस पुगेको भन्दै एक महिनादेखि लगातार आन्दोलन चलिरहेको छ ।

माओवादीले जनयुद्धदेखि नै जातीय पहिचानसहितको पक्षमा आफूलाई उभ्याउँदै आएको थियो । तर, सातै प्रदेशको नाम भूगोल र नदीबाट राखिँदा माओवादीले आफूलाई पहिचानको अडानमा टिकाइराख्न सकेन ।

कोशीमा पनि माओवादीको समर्थनसहित दुई तिहाइ बहुमतले नाम जुरेको थियो ।