काठमाडौँ २१ चैत । भुटानका राजा जिग्मे खेसर नामग्याल वाङचुक सोमबार तीनदिने भारत भ्रमणका लागि नयाँ दिल्ली आएका छन् ।राष्ट्रपति द्रौपदी मुर्मूको निमन्त्रणामा राजा वाङचुक भारत आएका हुन् ।

चीनसँगको सीमा विवादका सन्दर्भमा भुटानका प्रधानमन्त्री लोटे छिरिङको ‘सफ्ट’ धारणा बाहिर आएपछि भारतको कुटनीतिक वृत्त तरंगित भएका बेला राजा दिल्ली आएका हुन् । विदेशमन्त्री एस जयशंकरले इन्दिरा गान्धी अन्तर्राष्ट्रिय विमानस्थलमा राजा वाङचुकको स्वागत गरेका छन् । अपराह्न दिल्ली आइपुगेका राजा वाङचुक होटल ताज प्यालेसमा बसेका छन् ।

पहिलो दिन विदेशमन्त्री जयशंकरसँग भेटवार्ता गरेका राजाको दोस्रो दिन प्रधानमन्त्री नरेन्द्र मोदी र राष्ट्रपति मुर्मूसँग भेटघाट हुनेछ ।

बेल्जियम भ्रमणका क्रममा त्यहाँको मिडियालाई दिएको अन्तर्वार्तामा भुटानी प्रधानमन्त्री छिरिङले भुटानको सीमाभित्र चीनले कुनै गाउँ नबसाएको टिप्पणी गरेका छन् । जवकि २०२० को एक रिपोर्ट अनुसार भुटानको सीमा मिचेर चीनले गाउँ बसाएको कुरा बाहिर आएको थियो ।

चीनको भूटानसससंगको सम्वन्ध बढेको बेला भएको भुटानी राजाको भ्रमणलाई अर्थपूर्ण रुपमा हेरिएको छ ।

भारतमा त्यही विषयले चर्चा पाएका बेला त्यसलाई भुटानी प्रधानमन्त्रीले खण्डन गरिदिएका छन् । आफ्नो अन्तरवार्तामा उनले चीनको तर्फबाट सीमा अतिक्रमण नभएको स्पष्ट पारेका छन् । भुटानी प्रधानमन्त्रीको उक्त भनाइलाई भारतमा भने चीनको दबाब वा प्रभावमा आएको भन्दै व्याख्या गरिएको छ । प्रधानमन्त्री छिरिङले डोकलम सीमा विवाद भुटान, चीन र भारतको त्रिपक्षीय विषय रहेको पनि भनेका छन् ।