काठमाडौँ, १७ चैत । प्रधानमन्त्री पुष्पकमल दाहाल ‘प्रचण्ड’ले आज मन्त्रिपरिषद् विस्तार गर्ने भएका छन् । बिहीबार अबेरसम्म प्रधानमन्त्री निवास बालुवाटारमा बसेको बैठकमा सहमति नभएपछि मन्त्रिपरिषद् विस्तार मिति आजलाई सरेको हो ।
शुक्रबार बिहान एक चरण छलफल गरेर दिउँसोसम्म शपथ दिलाउने गठबन्धनको तयारी रहेको एक नेताले बताए ।
बिहीबार बसेको गठबन्धन बैठकमा मिल्न बाँकी मन्त्रालयहरू आफैँ मिलाउने भन्दै प्रधानमन्त्री प्रचण्डले सत्ता साझेदार दलहरूलाई मन्त्रीको नाम दिन आग्रह गरेका थिए ।
सत्ता साझेदार दलहरूसँग सामूहिक र एक्लाएक्लै संवाद गरे पनि दलहरूले केही मन्त्रीको नाम टुंगो लगाउन नसक्दा मन्त्रिपरिषद् विस्तारमा ढिलाइ भएको थियो ।
गठबन्धनमा कांग्रेसले ८, नेकपा (माओवादी केन्द्र)ले ५, नेकपा (एकीकृत समाजवादी) र जनता समाजवादीले २–२, नागरिक उन्मुक्ति पार्टी, लोकतान्त्रिक समाजवादी, जनमत पार्टीले एक–एक मन्त्रालय पाउने यसअघि नै सहमति भइसकेको छ ।
प्रतिक्रिया दिनुहोस्