मोरङ, १२ चैत । कोसी प्रदेशका मुख्यमन्त्री हिक्मतकुमार कार्कीले संघीयता स्थापनापछि जनताले विकासको अनुभूति गर्न पाएको बताएका छन्।

नेपाल कानुन समाजद्वारा आज यहाँ आयोजित संघ, प्रदेश र स्थानीय सरकारको प्रभावकारी समन्वय र भावि रणनीति विषयक अन्तरक्रियामा उनले भने, ‘विगत २० बर्षमा नभएको विकास प्रदेश सरकार स्थापनाको छ बर्षको अवधिमा गरेको छ’ । ’

मुख्यमन्त्री कार्कीले आठ सय किलोमिटर कालोपत्रे सडक र सयौं झोलुङ्गे र मोटरेवल पुल निर्माण गरेको जानकारी समेत दिए । संविधान र कानुनले व्यवस्था गरे अनुरुपम निर्णय प्रकियाको माध्यमबाट प्रदेशको नामाकरण गर्न सफल भएको छौं भन्दै उनले नामाकरणका क्रममा देखिएका केही असन्तुष्टि छलफलको माध्यमबाट समाधान हुने विश्वास व्यक्त्त गरे ।

संघीयताको मूल मर्म भनेको विकेन्द्रीकरण गरी तलसम्मका जनतालाई अधिकार सम्पन्न गराउनु हो भन्दै नेपालको संघीयतामा वित्तीयता,प्रशासनिक र राजनीतिमध्ये राजनीतिक छिटो कार्यान्वयन भएको विचार राखे । उनले संघीयतालाई बलियो बनाउनु यस प्रकार अन्तरक्रियाबाट आउने सुझाव, आलोचन र टिप्पणीले सहयोग पुग्ने बताए ।

कोसी प्रदेशका सभामुख बाबुराम गौतले अर्थ, रक्षा र परराष्ट्र वाहेक विकासे कार्यालय प्रदेश मातहमत भएमा संघीयता बलियो हुने विचार राखे ।

नेपाल सरकारका मुख्य सचिव शंकरदास वैरागीले मुलुकमा संघीयतालाई विदेशी नक्कल होइन मौलिक रुपमा कार्यान्वयन गर्नुपर्ने आवश्यक्त्तता औँल्याए । उनले संघीयतालाई व्यवस्थापन गर्ने संयन्त्रलाई क्रियाशील बनाई प्रभावकारी रुपमा कार्यान्वयन गर्ने वातावरण निर्माण गर्नुपर्नेमा जोड दिए ।