काठमाडौं ३ चैत । माधव नेपाल नेतृत्वको नेकपा एकीकृत समाजवादीले प्रधानमन्त्री नियुक्ति र राष्ट्रपतिको निर्वाचनमा जस्तै सरकारमा सामेल हुन बेलापनि लफडा गर्ने भएको छ । माधव नेपालले आफ्ना नेताहरुलाई गृहमन्त्रालय आफूले पाउनु पर्ने भन्दै त्यसका बारेमा बोल्न लगाएका छन् । सो पार्टीका उपाध्यक्ष राजेन्द्र पाण्डेले सरकारमा सहभागी हुँदा आफूहरूले रोजेकै मन्त्रालय लिने बताएका छन्।

उपराष्ट्रपति निर्वाचनपछि सञ्चारर्मीलाई प्रतिक्रिया दिँदै उनले अब रोज्ने पालो आफूहरूको भएको बताए। ‘राष्ट्रपति कांग्रेसले, प्रधानमन्त्री माओवादी र उपराष्ट्रपति जसपाले रोज्यो अब रोज्ने पालो हाम्रो,’ उनले भने, ‘ सरकारमा हामी चौंथो शक्ति, रोजेकै मन्त्रालय लिन्छौ‌।’

नेकपा एसको प्राथमिकतामा गृह मन्त्रालय रहेको उनले बताए। कम्तिमा तीन मन्त्रालयमा आफूहरूले दाबी गर्ने उनको भनाइ थियो।

मन्त्री कसलाई बनाउने भन्ने निर्णय भने नभइसकेको उनले बताए। तर रोजेकोसहित कम्तिमा तीन मन्त्रालय आफूहरूले लिने, यसमा गठबन्धनबाट पनि धोका नहुने उनको भनाइ थियो।