काठमाडौं २५ फागुन । प्रधानमन्त्री तथा नेकपा (माओवादी केन्द्र) का अध्यक्ष पुष्पकमल दाहाल प्रचण्डविरुद्ध सर्वोच्च अदालतमा परेको रिट न्यायाधीश विश्वम्भर प्रसाद श्रेष्ठको एकल इजलासमा पेशी तोकिएको छ ।

प्रचण्डमाथि ५ हजार जनाको ज्यान गएकोमा जिम्मा लिएको भन्ने राजनीतिक भाषणका आधार बनाएर गत मंगलबार मुद्दा दायर भएको थियो ।

प्रधानमन्त्री प्रचण्डले २०७६ माघ १ गते टुँडिखेलमा आयोजित थारू माघी महोत्सव कार्यक्रमलाई सम्बोधन गर्दै आफूले १० वर्षे युद्धकालमा भएको १७ हजार बढीको हत्या मध्ये ५ हजार जनाको हत्याको जिम्मा लिने आशयको अभिव्यक्ति दिएका थिए ।

सोही अभिव्यक्तिलाई मुख्य विषय बनाएर पीडितको नाममा पश्चिमा शक्ति केन्द्रको डिजाइनमा प्रचण्ड विरुद्ध मुद्दा दायर गरिएको हो ।

रिट निवेदनको पक्षमा कांग्रेस महाधिवेशन प्रतिनिधिसमेत रहेका रामेछापका ज्ञानेन्द्रराज आरणसहित रहेका छन् ।
बरिष्ठतम् मध्येका न्यायधिश श्रेष्ठको बेन्चले सत्य निरुपण तथा मेलमिला आयोगले मात्र यस्ता मुद्ध हेर्ने भन्दै खारेज गर्ने वा विपक्षीका नाममा कारण देखाउ आदेश जारी गर्ने मध्ये एक आदेश गर्ने सर्वोच्च निकट स्रोतले बताएको छ ।