काठमाडौं, १४ माघ । नेकपा (माओवादी केन्द्र) का अध्यक्ष पुष्पकमल दाहाल प्रचण्ड र एमाले अध्यक्ष केपी शर्मा ओलीबीच निर्णायक वार्ता शुरु भएको छ ।

दुवै पार्टी एकीकरण र वाम सरकार गठनका विषयमा विभिन्न शंकाहरु उत्पन्न भइरहेको बेला आईतबार बिहान ११ बजेदेखि प्रचण्ड र ओलीबीच प्रचण्ड निवास खुमलटारमा निर्णायक वार्ता शुरु भएको छ।

यसका अघिका वार्ता ओली निवास बालकोटमा हुने गरेको भएपनि आज भने ओली आफै प्रचण्ड निवास खुमलटार पुगेका हुन । एमालेका ओली पक्षका नेताहरुले सरकार र एकीकृत पार्टीको नेतृत्व ओलीले नै गर्नु पर्ने भन्दै लबिङ गर्न थालेपछि माओवादीमा शंका उत्पन्न भएको थियो । माओवादी नेताहरु दुवै पार्टीका अध्यक्षले सम्माजनक रुपमा पद पाउनु पर्ने बताउदै आएका थिए ।

एमालेले अध्यक्ष ओलीले सरकारको नेतृत्व गर्दा माओवादी अध्यक्ष प्रचण्डले एकीकृत पार्टीको नेतृत्व गर्नु पर्ने माओवादी नेताहरुको अडान छ ।
आजको वार्तामा पार्टी एकीकरण र सरकार गठनका विषयमा निष्कर्ष निकालिने उच्च स्रोतले जानकारी दिएको छ । ओलीले सरकारको नेतृत्व गर्दा प्रचण्डलाई एकीकृत पार्टीको नेतृत्व दिनु पर्ने माओवादीको ठम्याइ छ ।
यदि यसमा ओली सहमत नभए दुई वाम एकीकरणको विषय तत्कालका लागि रोकिने छ । माओवादीले सरकारमा एमालेलाई समर्थन गर्ने छ भने पार्टी एकीकरणका लागि छलफल जारी राख्ने र तत्काल एकीकरणको नगरिने उच्च स्रोतको भनाइ छ ।
ओलीको नेतृत्वमा वाम सरकार बनाउन भने माओवादी तयार देखिएको छ । माओवादी उच्च स्रोतले भन्यो, “हाम्रो जोड त पार्टी एकीकरणमै हुन्छ । पार्टी एकीकरण गर्छौ भनेरै जनतामाझ गएका थियौं । र जनताले अनुमोदन पनि गरेका छन् । नेतृत्वको विषयमा एमाले सहमत भएन भने पनि सरकारमा एमालेलाई समर्थन गर्छौं ।”

ओली निकट एमाले दोस्रो तहका नेताहरु प्रचण्डलाई एकीकृत पार्टीको नेतृत्व नदिन लविङमा लागेका छन् । पूर्व प्रधानमन्त्री माधवकुमार नेपाल निकट नेताहरु भने ओलीले सरकारको नेतृत्व गर्दा प्रचण्डलाई एकीकृत पार्टीको नेतृत्व दिनु पर्ने पक्षमा छन् । नेपाल पक्षका एक नेता भन्छन, “एक व्यक्ति एक पद त ओली कमरेडले उहिल्यैदेखि भन्दै आउनु भएको हो । अहिले पनि त्यही गर्दा राम्रो हुन्छ ।”
दुई वाम पार्टी एकीकरणको टुङ्गो नलागे पनि सहकार्य भने जारी रहने जनाएको छ ।