काठमाडौँ, १० फागुन । राष्ट्रपति र उपराष्ट्रपतिको निर्वाचनमा समेत विद्युतीय मदतान उपकरण (इलेक्ट्रोनिक भोटिङ मेसिन ‘इभिएम’)को प्रयोग नहुने भएको छ । राष्ट्रपति तथा उपराष्ट्रपतिको निर्वाचनमा थोरै संख्यामा मतदान रहने हुँदा इभिएमको प्रयोग गर्न सकिने सम्भावना थियो ।

राष्ट्रपति तथा उपराष्ट्रपतिको निर्वाचन २०७९ मा इभिएमको प्रयोगबारे राखिएको जिज्ञासामा प्रमुख निर्वाचन आयुक्त दिनेशकुमार थपलियाले भने, “पुरानो उपकरण काम लग्ने अवस्थामा छैन, नेपालीले बनाएको प्रमाणीकरण भएको छैन, नयाँ खरिद गरेर प्रयोग गर्ने सम्भावना देखिन्न ।”

राष्ट्रपतिको निर्वाचन फागुन २५ गते र उपराष्ट्रपतिको निर्वाचन चैत ३ गते हुँदै छ ।

राष्ट्रपति तथा उपराष्ट्रपतिको निर्वाचन भने ८३१ मतदाता छन् । मतदानस्थलसमेत एउटै निर्धारण गरिएको छ । सीमित संख्यामा मतदान रहने र एउटै स्थानमा दुईवटा मतदान केन्द्र रहने हुँदा इभिएमको प्रयोगको सम्भावना देखिएको थियो । मत बदर नहुने, मतदान र गणना प्रक्रिया छिटोछरितो हुने हुनाले इभिएम खरिद महँगो भए पनि प्रयोग सहज हुन्छ ।