काठमाडौँ — राष्ट्रपति निर्वाचनलाई लिएर सत्ता समीकरणमा फेरबदलको प्रयास भइरहेका बेला सत्तारुढ एमाले अध्यक्ष केपी शर्मा ओलीले चिरपरिचत प्रतिद्धन्द्धी माधव नेपाल र ओलीका अरुचिकर पात्र डा.बाबुराम भट्टराईलाई नयाँराष्ट्रपति पदको ललिपप दिएका छन् ।

मौजुदा गठबन्धनमा सामेल गर्न समेत तयार नभएका एमाले अध्यक्ष ओलीले आइतबार बेलुका माधव नेपालसँग दुई घण्टा लामो प्रशिक्षण सहित राष्ट्रपति बन्न प्रस्ताव गरेका छन् । माधव नेपालका एकजना सहयोगीका अुनसार ओलीले पहिले माधव नेपाललाई फोन गरेर बालकोट बोलाएका थिए । नेपालले बालकोट जान अस्वीकार गरेपछि एमाले महासचिव पृथ्वी सुव्वा गुरुङको संयोजनमा महाराजगन्जको एक निजी घरमा दुई नेताबीच भेटघाट भएको थियो । भेटमा पुराना कुरा विर्सेर नयाँ ढंगले अघि बढ्न ओलीले नेपाललाई सुझाव दिएका थिए । पृथ्वी सुव्वा गुरुङ  सहितका नेताहरुले माधव नेपालाई राष्ट्रपति बन्न र एकीकृत समाजवादीलाई एमालेमा विलय गर्न दबाव दिइरहेका छन् । माधव नेपाल राष्ट्रपति बन्ने कुरामा आश्वस्त भए आफ्नो पार्टीलाई एमालेमा विलय गर्न समते तयार देखिएका छन् ।

अझ रमाइलो त गत हप्ता डा.बाबुराम भट्टराईले आफैं ओलीसंग समय लिएर बालकोट पुगेका थिए । बालकोट बसाईमा भट्टराईले आफूलाई राष्ट्रपति बन्न सहयोग गर्न आग्रह गरेपछि ओलीले प्रचण्डलाई सहमत गराउनुस् मेरो तर्फबाट तपाइं नै राष्ट्रपतिको उमेद्वार हो भन्न पछि परेनन् ।

‘एमालेले समर्थन गर्छ भने तपाईंहरूले पनि गर्नुस्, राष्ट्रपतिको उम्मेदवारमा जतिसक्दो छिटो स्पष्ट निर्णय लिनुस भन्दै माधव नेपालले प्रधानमन्त्री प्रचण्डलाई आग्रह गरेका थिए । नेपालसँगको वार्तापछि प्रचण्डले पार्टी पदाधिकारी बैठकमा त्यबारे रिपोटिंग गरेका थिए।

पूर्व प्रधानमन्त्री समेत रहेका नेता नेपालले देशको हित गर्ने सन्दर्भमा  सबै गम्भीर हुनुपर्ने बताए । ‘संविधान र गणतन्त्रको रक्षाका लागि सजग हुनुपर्ने र गणतन्त्र जोगाउने कुरा अहिलेको आवश्यकता हो । तर हाम्रोतर्फबाट राजनीतिक मूल्यमान्यता र आदर्शलाई त्यागेर कुनै किसिमको सहमति, सम्झौता सम्भव छैन । यिनै कुराहरूलाई ध्यानमा राखेर कुराकानीहरू गर्छौ । कुरा गर्न चाहने र विचार मिल्न सक्नेसँग कुरा गर्छौ’, नेपालले मंगलबार दांगमा सञ्चारकर्मीहरुसंग बताए ।

प्रचण्डले पार्टी पदाधिकारी बैठकमा बताए अनुसार ओलीले सुरुका छलफलमा वाग्मती प्रदेशका पूर्वमुख्यमन्त्री डोरमणि पौडेल र एमाले स्थायी कमिटी सदस्य गुरुराज बरालको नाम प्रस्ताव गर्दथे । ‘ओलीको मुख्य चाहना डोरमणि पौडेल र गुरु बराल मध्ये एक हो । ओलीले अघि सारेका नाम प्रचण्डले अस्वीकार गरेपछि उनले माधव नेपाल, बाबुराम भट्टराई र झलनाथ खनाललाई छुट्टाछुट्टै भेटेर तपाईं नै राष्ट्रपतिको उम्मेदवार हो भन्नुभएछ । त्यसकारण परिस्थिति जटिल छ ।’

राष्ट्रपतिका लागि विभिन्न दलबाट धेरै आकांक्षी रहे पनि ठूलो दल कांग्रेसबाट नै राष्ट्रपति चयन हुने गरी राजनीतिक घटनाक्रम विकसित भएको उनको भनाइ छ । माओवादी उपाध्यक्ष एवं प्रवक्ता कृष्णबहादुर महराले भने स्वार्थ जोसँग मिल्छ, त्यससँग सहकार्य गर्ने निष्कर्ष पार्टीले निकालेको बताए । ‘पुस १० भन्दा अहिले परिस्थिति फेरिएको छ । गणतन्त्र, संविधानको रक्षा र शान्ति प्रक्रिया टुंगो लगाउने विषय हाम्रा स्वार्थ हुन् । यी स्वार्थमा जोसँग मिल्छ, त्यससँग सहकार्य हुन्छ,’ एक माओवादी नेताले बताए ।

ओलीले दिएको ललिपपमा माधव नेपाल र बाबुराम भट्टराईले मुख मिठाए पनि लड्डु भने रामचन्द्र पौडेल र कृष्ण सिसटौलामध्ये एकले खाने निश्चित छ एक कांग्रेस नेताले बताए ।आगामी फागुन २५ मा हुने राष्ट्रपति निर्वाचनका लागि कुल ५२ हजार ७ सय ७ मतभार छ । निर्वाचनमा संघीय संसद् र प्रदेशसभाका सांसदहरू मतदाता हुन्छन् । मतभारका हिसाबले कांग्रेस (१६,२२१), एमाले (१५,२३३) र माओवादी केन्द्र (७,७४५) क्रमशः पहिलो, दोस्रो र तेस्रो ठूलो दलका रूपमा छन् । राष्ट्रपति निर्वाचित हुनका लागि २६ हजार ३ सय ५४ मतभार आवश्यक पर्छ । कांग्रेस र एमाले एक ठाउँमा रहेको अवस्थामा बाहेक माओवादी केन्द्र निर्णायक छ । माओवादी यही मतलाई रणनीतिक रूपमा प्रयोग गर्ने प्रयासमा छ । तर माओवादी केन्द्रलाई पहिलो र दोस्रो ठूलो दलसँग मिलेको अवस्थामा पनि मधेसवादी वा अन्य साना दलको मत आवश्यक पर्छ । राष्ट्रपति निर्वाचनमा गोप्य मतदान हुने र पार्टीको ह्वीप नलाग्ने भएकाले साना दलहरूको निर्णयले परिणामलाई प्रभावित गर्न सक्छ ।

राष्ट्रपति निर्वाचनका लागि एकीकृत समाजवादीसँग २ हजार ५ सय ७४, राप्रपासँग २ हजार ४ सय ५०, राष्ट्रिय स्वतन्त्र पार्टीसँग १ हजार ५ सय ८०, नागरिक उन्मुक्ति पार्टीसँग ८ सय ९२, जनमोर्चासँग २ सय ६, नेमकिपासँग २ सय २३, राष्ट्रिय सभामा मनोनीत सांसदसँग २ सय ३७ र स्वतन्त्र सांसदहरूसँग ९ सय ८८ मतभार रहेको छ ।