काठमाडौं ५ फागुन । आइसिसी विश्वकप लिग–२ अन्तर्गत स्कटल्यान्डविरुद्ध नेपालका कुशल मल्लले अर्धशतक प्रहार गरेका छन्। मल्लले ४२ बलमा अर्धशतक बनाउन ६ चौका र ३ छक्का हानेका थिए ।
कुशलको यो एकदिवसीय खेलमा भएको दोस्रो अर्धशतक हो । यसअघि उनले लिग–२ कै खेलमा अमेरिकाविरुद्ध अर्धशतक बनाएका थिए ।
नेपालले स्कटल्यान्डले दिएको २७५ रनको लक्ष्य पछ्याएर ब्याटिङ गरिरहेको छ ।
कीर्तिपुरस्थित त्रिवि मैदानमा जारी खेलमा ओपनर कुशल भर्तेल १६ रन बनाएर तेस्रो ओभरमा, ज्ञानेन्द्र मल्ल ४ रनमा सोही ओभरमा र आसिफ शेख पाँचौ ओभरमा ९ रन बनाएर आउट भए। तीनै जनालाई स्कटल्यान्डका क्रिस सोलले क्याच आउट गरे। उनले पहिलो ओभरमा २३ रन खर्चिए पनि त्यसपछि उत्कृष्ट बलिङ गरे।
यस्तै नेपालका कप्तान रोहित पौडेल ६ रन तथा सन्दीप जोरा ५ रन जोडेर आउट भए। दुवैलाई स्कटल्यान्डका मार्क वाटले आउट गरे।
अहिले नेपालका लागि दीपेन्द्रसिंह ऐरी र कुशल मल्ल ब्याटिङ गरिरहेका छन्। नेपालले २० ओभरमा १२७ रन बनाउँ दा पाँच विकेट गुमाएको छ। यस अघि दुई दिन भएको एक दिवसीय खेलमा नेपालले नामवियालाई पराजित गरेको थियो ।