काठमाडौँ, २ फागुन । नेपालको ताज महल भनेर चिनिने प्रेमको प्रतिक पाल्पाको रानी महलमा प्रेम दिवस (१४ फेब्रुअरी) को दिन २५ जना विवाहित जोडीहरू सम्मानित हुँदै छन् ।

पाल्पाको तानसेन नगरपालिका–१३ मा पर्ने रानी महल दरबारमा प्रेम दिवसको अवसर पारेर विवाहित तथा अविवाहित सयौँ पर्यटक जोडी पुग्ने गर्दछन् ।

प्रेम दिवसको अवसर पारेर तानसेन नगरपालिकाले मंगलबार आयोजना गरेको विविध कार्यक्रममा २५ जोडी विवाहित पर्यटकलाई सम्मान गर्न लागिएको नगरपालिकाका प्रवक्ता एवम् वडा नम्बर १० का अध्यक्ष यादवसिंह कार्कीले जानकारी दिए ।

भारतका विभिन्न ठाउँ र नेपालका विभिन्न टाढाको दुरीबाट आउने पर्यटकहरू पनि सोमबार नै रानी महल पुगेका छन् । रानी महलको छेवैमा रहेको कालिगण्डकी नदीमा र्याफ्टिङ गरेर आनन्द लिने पर्यटकहरूले हालै निर्माण भएको झोलुङे पुलमा मनोरम दृश्यको अवलोकन तथा सेल्फी लिएर रमाउने छन् । प्रेम दिवसको दिन यहाँ पर्यटकको घुँइचो नै लाग्ने गर्दछ ।