काठमाडौँ, २४ माघ । टर्की भूकम्पले भत्किएको भवनको भग्नावशेषमा पुरिएका चर्चित फुटबल स्टार क्रिश्चियन अत्सु जीवित भेटिएका छन् । बेलायती अनलाइन डेली मेलका अनुसार अत्सु जीवितै फेला परेका हुन् ।

अहिले उनको अस्पतालमा उपचार भइरहेको बताइएको छ । इंग्लिस क्लब चेल्सी र न्युक्यासलका पूर्वस्टार अत्सु भूकम्पले पूरै ध्वस्त भएको ठुलो भवनमुनि फसेका थिए । अहिलेसम्म उक्त भूकम्पका कारण ३ हजार ८०० भन्दा बढी व्यक्तिको मृत्यु भएको छ भने हजारौँ घाइते भएका छन् ।

३१ वर्षीय उनी यसअघि सन् २०१३ मा इंग्लिस क्लब चेल्सीमा पनि आबद्ध भएका थिए । तर, उनले चेल्सीबाट खेल्न पाएनन् । उनलाई क्लबले ऋणमा इंग्लिस क्लबहरू एभर्टन र न्युक्यासलमा पठाएको थियो ।

उनले न्युक्यासलमा रहँदा १०७ खेल खेल्दै ८ गोल गरेका थिए । त्यसपछि उनी सन् २०२१ मा साउदी अरेबियाको अल रायद क्लबमा आबद्ध भएका थिए ।

त्यसपछि अघिल्लो सिजन उनी साउदीबाट टर्की पुगेका थिए । आत्सुले यही आइतबार मात्रै हातायोस्परबाट टर्किस लिग खेलेका थिए । उक्त खेलमा उनले खेलको अतिरिक्त समयको सातौँ मिनेटमा गोल गर्दै टिमलाई जिताएका थिए ।