काठमाडौँ, २४ माघ । टर्कीमा सोमबार बिहानै आएको ७.८ म्याग्नेच्युडको शक्तिशाली भूकम्पमा परी अहिलेसम्म ३ हजार ७०० भन्दा बढी मानिसले ज्यान गुमाएका छन् ।
समाचार संस्था एपीका अनुसार भूकम्पले टर्कीसहित सिरिया, लेबनान र इजरायलमा पनि क्षति पुर्याएको छ । मृतकको संख्या अझै बढ्न सक्ने बताइएको छ । हजारौँ मानिसहरू घाइते भएका छन् ।
सबैभन्दा धेरै क्षति टर्की र सिरियामा भएको छ । त्यहाँ सयौँ घरहरू भत्किएका छन् । टर्कीको आन्तरिक मामिला मन्त्रालयका अनुसार १० वटा सहरमा भूकम्पले क्षति पुर्याएको छ ।
लगातार आइरहेको परकम्पले घरभित्र पुरिएका मानिसहरूको खोजी कार्यमा कठिनाइ भएको छ । अहिलेसम्म ५० भन्दा बढी परकम्प आइसकेको बताइएको छ । तीमध्ये एउटा परकम्प ६.६ म्याग्नेच्युडको थियो ।
स्थानीय समयअनुसार सोमबार बिहान ४ बजेर १७ मिनेटमा सिरियाको सीमा नजिकै दक्षिणी टर्कीमा केन्द्रबिन्दु बनाएर भूकम्प गएको थियो ।
प्रतिक्रिया दिनुहोस्