काठमाडौँ १७ माघ । नेपाललाई सबै छिमेकीहरूसँग आर्थिक सहकार्य गर्न अमेरिकी राजनीतिक मामिला उपमन्त्री भिक्टोरिया नुल्यान्डले सुझाव दिनु अहिले पनि विश्वलाई अमेरिकाले नै शासन गरिरहेको छ, दक्षिण एशियामा पनि हामीले भनेको नै मान्नु पर्छ भन्ने सन्देश हो । उनले नेपालले छिमेकी मुलुकहरूसँग आर्थिक सहकार्य गर्दा महत्त्वपूर्ण पक्षको रुपमा आफ्नो सार्वभौमसत्ता रक्षा गर्ने विषयमा ध्यान दिनु पर्ने बताएर त्यसको संकेत भारततिर गरेकी हुन् कि चीनतिर भन्ने स्पष्ट हुँदैन । किन भने अहिलेसम्म नेपालीहरुले बुझेको नेपालको सर्वाभौमसत्ता भारतबाट खतरामा पर्ने गरेको छ भन्ने हो । भारतसँग नेपालको भूगोलको पनि विवाद छ । तर अमेरिकी अधिकारीले भनेको भारततिर भन्दा बढी चीन लक्षित हो भन्ने प्रष्ट छ । गतकालमा देउवा प्रधानमन्त्ती रहेका बेला उत्तरी सीमा नाकामा चीनले नेपाली भुमी कव्जा गरेको भन्ने निकै ठूलो प्रचारवाजी भएको थियो । सम्भवत अमेरिकी अधिकारी अहिलेसम्म पनि त्यही सूचना दिमागमा पालेर काठमाडौं ओर्लेकी हुनसक्छिन् ।

उनले अमेरिकाको भारतसँग साँच्चै बलियो सम्बन्ध रहेको बताउँदै नेपालको अर्को छिमेकी राष्ट्र चीनसँग पनि अमेरिकाको सम्बन्ध सुमधुर रुपमा अघि बढिरहेको भन्न पनि पछि परिनन् । ‘गत नोभेम्वरमा अमेरिकी राष्ट्रपति जो बाइडेन र चिनियाँ राष्ट्रपति सी चिनफिङले भेटवार्ता गरेका थिए । आगामी साता चीनसँग अमेरिकाको अझ बढी संलग्नताहरू हुँदै छन् भन्ने जानकारी पनि उनले बताएकी थिइन् ।

उपमन्त्री नुल्यान्डले अमेरिकाले एउटा वा अर्को (देश रोज्ने) भन्नेबारे धारणा नराख्ने बताएपनि संसार भर अमेरिकाले आफ्नो र अर्काे देश भन्ने भाष्या बनाउंदै आएको छ । ‘‘धेरै मौकाहरू छन् । तर‚ हामी जहाँ जे गरिरहेका छौं, तपाईं (नेपाल) का जनता र अमेरिकी जनतालाई फाइदा होस् तथा दुवै मुलुकको लोकतान्त्रिक सम्बन्ध बलियो बनोस् भन्ने उद्देश्य हो ।’ उपमन्त्री नुल्यान्डले अमेरिकाले नेपालमा जे गरे पनि सहकार्य र आर्थिक सम्बन्धलाई बलियो बनाउन चाहेको बताएकी छन् । यसको अर्थ अब नेपाल अमेरिकी कुटनीतिक र रणनीतिको अनिवार्य राडारमा परेको भन्ने नै हो ।

अमेरिकी उपमन्त्री न्युल्याण्डले प्रधानमन्त्री पुष्पकमल दाहाल प्रचण्ड, नेका सभापति शेर बहादुर देउवा, एमाले अध्यक्ष केपी शर्मा ओली र परराष्ट्रमन्त्री विमला पौड्याल राईसंग भेटवार्ता गरे पछि अमेरिकी दूतावासमा छानिएका नेपाली केही बद्धिजीवी र पत्रकारहरुलाई पनि भेटेको बताइएको छ ।