काठमाडौँ १५ माघ । राहदानी विभागले सोमबारबाट एक महिनाको अग्रिम अनलाइन आवेदन (प्रि इनरोलमेन्ट)को व्यवस्था गरेको छ । आइतबार सूचना प्रकाशित गर्दै विभागले दैनिक १ हजार ५ सयका दरले एक महिनाको प्रि इनरोलमेन्ट हुने जनाएको छ ।
]विभागमा हालसम्म २ देखि ३ दिनको प्रि इनरोलमेन्टको मात्रै व्यवस्था रहेकोमा त्यसको समय लम्ब्याएर एक महिनाको अग्रिम आवेदनको व्यवस्था गरिएको हो ।
अग्रिम आवेदन छोटो अवधि हुँदा सेवाग्राहीले विभागबाट सेवा लिन नपाएर झन्झट ब्यहोर्नु परेको गुनासो सुनिने गरेकोमा सुधार गरेको दावी गर्दै विभागले यस्तो व्यसवस्था गरेको हो ।
यो व्यवस्थाले अहिले देखिएको समस्या समाधान गर्ने विश्वास लिएका छौं । कसैले सोमबार प्रि इनरोलमेन्ट गर्दा फागुन १५ गतेसम्म समय पाउनु हुनेछ,ु विभागका महानिर्देशक डमरुबल्लभ पौडेलले भने, ुराहदानी लिनका लागि लाइन नमिची तोकिएको समयमा आइदिनु भयो भने हाम्रो प्रणालीमा समस्या पर्दैन । सहज रुपमा राहदानी पाउनु हुनेछ ।
विभागले अहिले देखिएको भीड सहज नहुन्जेल एक महिनाको समयको प्रि इनरोलमेन्टको व्यवस्था गर्ने जनाएको छ । त्यसपछि मंगलबारबाट दैनिक रुपमा १५ सयका दरले प्रि इनरोलमेन्ट खुला हुने विभागले जनाएको छ । जसअनुसार माघ १७ गते प्रि इनरेलमेन्ट गर्नेले फागुन १६ सम्मको समय लिन सक्ने विभागले जनाएको छ ।
त्यसैगरी माघ १८ मा प्रि इनरोलमेन्ट गर्दा फागुन १७सम्मको समय लिन सकिने छ । विभागले हाल दैनिक ६ हजार राहदानी छपाइ गर्दै आएको छ ।
विभागले जारी गरेको सूचनामा विभाग लगायत विदेशस्थित कूटनीतिक नियोग, जिल्ला प्रशासन कार्यालय, इलाका प्रशासन कार्यालयले एक महिनाको प्रि इनरोलमेन्ट गराउने छन् ।
प्रकाशित : माघ
प्रतिक्रिया दिनुहोस्