काठमाडौं १५ माघ । सर्वोच्च अदालतको फैसलासँगै एकसाथ चार पद गुमाएका रवि लामिछानेले पूर्व उपप्रधानमन्त्री एवं गृहमन्त्रीको हैसियत के हुन्छ भन्ने बारे विज्ञहरु जुन पद जन्म भएको त्यो नै अवैध भएपछि कुनै पनि पूर्व पद वैधानिक नहुने बताएका छन् ।

सर्वोच्च अदालतले रवि लामिछानेको नागरिकता कायम नरहेको फैसला गरेपछि प्रतिनिधि सभा सदस्यसँगै उपप्रधानमन्त्री, गृहमन्त्री र राष्ट्रिय स्वतन्त्र पार्टीको सभापति पद गुमाए। लामिछाने उपप्रधानमन्त्री तथा गृहमन्त्रीमा ३२ दिन, सांसदको हैसियतमा ३६ दिन र पार्टी सभापतिका रूपमा करीब सात महीना पदमा बसे। तर, उनी यी पदमा बसिसकेको कानूनी हैसियत भने हुने छैन।

वरिष्ठ अधिवक्ता सुरेन्द्र थापा मगरका अनुससार लामिछानेको सांसद पद नै अवैधानिक भएपछि कानूनी रूपमा पूर्व उपप्रधानमन्त्री एवं गृहमन्त्रीको हैसियत पनि हुँदैन। “निर्वाचित भएको पद नै रद्द भइसकेकाले रवि लामिछानेले आफूलाई पूर्व उपप्रधानमन्त्री एवं गृहमन्त्री बनेको थिएँ भन्ने अवस्था रहंदैन थापाले स्पष्ट पारेका छन् ।

यसअघि अख्तियार दुरुपयोग अनुसन्धान आयोगमा तीन वर्ष प्रमुख आयुक्तका रूपमा बिताएका लोकमानसिंह कार्कीलाई सर्वोच्चले नै अयोग्य ठहर्‍याएपछि उनको पनि पूर्व प्रमुख आयुक्तको हैसियत रहेको थिएन। अहिले पनि अख्तियारको पूर्व प्रमुख आयुक्तहरूको सूचीमा कार्कीको नाम छैन। “पदमा पुग्ने योग्यता नै नरहेर खारेज गरिदिएपछि पूर्व पदाधिकारीको हैसियत हुने कुरै आउँदैन,” वरिष्ठ अधिवक्ता थापा भन्छन्।

माघ १३ गते सर्वोच्च अदालतको संवैधानिक इजलासले लामिछानेले अमेरिकी नागरिकता त्यागेपछि नेपाली नागरिकता पुनः कायम गराउने कानूनी प्रक्रिया नपुर्‍याएको भन्दै उनको सांसद पद अमान्य ठहर गरेको थियो। त्यसपछि उनी सबै पदबाट मुक्त भएका थिए। सर्वोच्चको फैसला आएको तेस्रो दिन आइतबार नै जिल्ला प्रशासन कार्यालय, काठमाडौंबाट लामिछानले कानूनी रित पुर्‍याएर पुनः नागरिकता कायम गराएका छन्।

गृह मन्त्रालयको निर्देशनमा काठमाडौं प्रहरी परिसरले अनुसन्धान गरिरहेकै वेला लामिछाने गृहमन्त्री बनेका थिए। त्यसपछि अनुसन्धान नै ठप्प बनेको थियो।

सर्वोच्चले लामिछानेको नागरिकता कायम नरहेको फैसला गरेपछि प्रहरीलाई अनुसन्धान गर्न अझ थप प्रमाण मिलेको छ । तर सत्ता गठबन्धनको मुख्य दल एमाले अध्यक्ष केपी शर्मा ओली र स्वयं रबि लामिछाने पुनः गृहमन्त्री बनाउन प्रधानमन्त्री प्रचण्डमाथि दबाव बढाएको बुझिएको छ । बालुवाटार स्रोतका अनुसार अब रवि लामिछाने गृहमन्त्री हुने सम्भावना शुन्य बराबर छ ।