काठमाडौं । ३०१ औं पृथ्वी जयन्ती एवं राष्ट्रिय एकता दिवसको अवसरमा बुधबार राष्ट्रिय प्रजातन्त्र पार्टीले काठमाडौंको भृकुटीमण्डपमा जलपान समारोह गर्यो ।

मध्यान्न १२ बजेदेखि भृकुटीमण्डपको चौरमा राप्रपाका नेता कार्यकर्ताले भरिएको थियो । भाषणको कुनै कार्यक्रम नराखिएको जलपान समारोहको सुरुमा राप्रपाका अध्यक्ष राजेन्द्र लिङ्देन, पूर्व अध्यक्ष पशुपति शमशेरण राणा, प्रकाशचन्द्र लोहनी आफ्नै दल तथा अन्य दलका नेता कार्यकर्तालाई स्वागत गरिरहेका थिए ।

राणा र लोहनी झण्डै १ घण्टा कार्यक्रममा बसेर बाहिरिएपछि अध्यक्ष लिङ्देन, वरिष्ठ उपाध्यक्ष बुद्धिमान तामाङ, महामन्त्री धवल शमशेर राणा, विक्रम पाण्डे लगायतले नेता कार्यकर्तालाई मञ्चमा उभिएर हात मिलाउँदै स्वागत गरे ।

खासगरी युवा पुस्ताका राप्रपा कार्यकर्ता नेता लिङ्देनसँग सेल्फी खिच्न व्यस्त देखिन्थे । राजाराम पौडेल, प्रेमराजा महत, योगेश्वर अमात्य, शम्भुजित वास्कोटा लगायतका कलाकारहरू जलपान समारोहमा पुगेका थिए ।

राजनीति दलका नेतार्फ नेपाली कांग्रेसका वरिष्ठ नेता रामचन्द्र पौडेल सबैभन्दा पहिला समारोहमा पुगे । उनी पुग्दा साढे २ बजेको थियो । त्यसपछि एमाले सांसद रघुजी पन्त, कांग्रेस सांसद रामहरि खतिवडा, एमाले नेता विष्णु रिमाल, राजन भट्टराई प्रमुख निर्वाचन आयुक्त दिनेश कुमार थपलिया पुगेका थिए ।

दिउसो ३ बजे एकीकृत समाजवादीका अध्यक्ष माधव नेपाल, उपमहासचिव प्रकाश ज्वाला आइपुगेका थिए ।

दिउँसो साढे ३ बजेतिर राष्ट्रिय प्रजातन्त्र पार्टी नेपालका अध्यक्ष कमल थापा पुगेका थिए । उनी मञ्चमा राप्रपाका नेता कार्यकर्ताको लाइनमा आबद्ध भएर मञ्चसम्म पुगेको दृश्य राप्रपाका नेता कार्यकर्ताले अनौठो मानेर हेरिरहेका थिए । मञ्चमा लिङ्देनसँग भेट भएपछि थापाले हात मिलाएर अंकमाल गरे ।

जलपान समारोहमा झन्डै ४ बजे उपप्रधानमन्त्री नारायणकाजी श्रेष्ठ पुगेका थिए । त्यसपछि गृहमन्त्री रवि लामिछाने पुगेका थिए । कार्यक्रममा सञ्चारकर्मीसँग बोल्दै उपप्रधानमन्त्री श्रेष्ठले पृथ्वीनारायण शाहले नेपालको भौगोलिक एकीकरण गरेको बताउँदै आजको दिन महत्त्वपूर्ण रहेको उल्लेख गरे ।

४ बजेर १० मिनेटमा एमाले अध्यक्ष केपी शर्मा ओली जलपान समारोहमा पुग्दा एउटा समूहले केपी बा हाई हाई भन्ने नारा समेत लगाएको थियो । मञ्च अगाडि राखिएको पृथ्वीनारायण शाहको तस्बिरमा पुष्प गुच्छा चढाएर ओली मञ्चमा पुगेका थिए । ओली पुगेको केहीबेरपछि राप्रपा अध्यक्ष लिङ्देनसहितका नेताहरु कार्यक्रम समापन गर्दै चियापान समारोहमा गएका थिए ।

प्रधानमन्त्री पुष्पकमल दाहाल (प्रचण्ड) ले सोमबार (२५ पुस) को मन्त्रिपरिषद् बैठकबाट पृथ्वीजयन्तीका दिन २७ पुसमा सार्वजनिक विदा दिने निर्णय गरे।

सत्ता गठबन्धनमा सामेल राष्ट्रिय प्रजातन्त्र पार्टी (राप्रपा) ले ‘सरकारमा सहभागिता’ र ‘प्रधानमन्त्रीलाई विश्वासको मत’ का लागि पृथ्वीजयन्तीमा सार्वजनिक विदालाई सर्त बनाएको थियो। त्यसैले, विश्वासको मत उपर प्रतिनिधि सभामा मतदान हुनु अघिल्लो दिन प्रचण्डले पृथ्वीजयन्तीमा विदा दिने निर्णय गरेका थिए।

विसं २०६२–०६३ अघिसम्म पृथ्वीजयन्तीमा दिइँदै आएको सार्वजनिक विदा लोकतान्त्रिक आन्दोलनको सफलतासँगै माओवादी शान्ति प्रक्रियामा आएपछि संसदवादी दलहरुको सरकारले कटौती गरेको थियो।

पृथ्वीजयन्तीका अलावा तत्कालीन राजा ज्ञानेन्द्र, रानी कोमल, युवराज पारस मात्र होइन, स्वर्गीय वीरेन्द्र र महेन्द्र जयन्ती (१ पुस) मा दिइँदै आएका विदाहरु पनि त्यो बेला कटौतीमा परेका थिए।

राप्रपा नेपालका अध्यक्ष कमल थापा उपप्रधानमन्त्री रहेका बेला प्रधानमन्त्री शेरबहादुर देउवाको सरकारले ०७४ मा विदा दिएबाहेक १७ वर्षयता पृथ्वी जयन्तीमा विदा दिने गरिएको थिएन।

पृथ्वी जयन्तीका तस्वीरलाई बालकोटले छानेर राखेका फोटाहरु यस्ता छन् ।

तस्वीर स्रोत  : बालकोटपेज