काठमाडौं, २० पुस । नेपाल टी–२० क्रिकेट लिग म्याचफिक्सिङको गम्भीर आरोपमा घेरिएको छ । लिग प्रारम्भदेखि नै विवादमा आइरहेको थियो । विवादकैविच पेलेर क्रिकेट एसोसिएसन अफ नेपालले भारतीय कम्पनीसँगको साझेदारीमा भइरहेको नेपाल टी–२० क्रिकेट लिग म्याच फिक्सिङको गम्भीर आरोपमा घेरिएको छ ।

लिगको प्रसारण सम्बन्धी साझेदार नै अनलाइन जुवामा सक्रिय रहनु, खेलको नतिजाबारे सामाजिक सञ्जालमार्फत जुवा सञ्चालन हुनु अनि लिगसँग जोडिएका व्यक्तिले म्याच फिक्सिङको गम्भीर आरोप लगाउनुले लिग गम्भीर विवादमा तानिएको छ । टी२० लिगमा म्याच फिक्सिङको आशंकामा प्रहरीको केन्द्रीय अनुसन्धान ब्युरो सीआईबीले अनुसन्धान थालेको छ । यद्यपी, क्यानले भारतीय कम्पनी सेभेन थ्री स्पोर्ट्सलाई साझेदार बनाउँदै लिग आयोजना गरिरहेको छ । काठमाडौँमा जारी नेपाल टि–२० क्रिकेट प्रतियोगितामा मगंलबार बिहान विवादास्पद बन्यो । बिहान ८ः३० बजेदेखि सुरु हुने पहिलो खेल काठमाडौँ नाइट्स र विराटनगर सुपर किङ्सबीचको खेल २ घण्टापछि सुरु भयो । पारिश्रमिक नपाएको भन्दै नेपाल टि–२० लिगका खेलाडीहरुले खेल खेल्न मानेका थिएनन् ।

बिहान ८ः३० बजे सुरु हुने खेलमा दुवै टोलीका कप्तानले टस गर्न नमानेपछि खेल विवादमा परेको हो । दुबै टोलीले प्लेइङ–११ मा नाम दर्तासमेत गराएका छैनन् । क्यानको आयोजनमा सञ्चालन भएको टि–२० लिगमा ६ टोली सहभागी छन् । फ्रेन्चाइज टोलीले आफूले पाउने रकम नपाएको भन्दै खेल नखेल्ने निर्णय गरेका थिए तर दुई घण्टा लामो विवादपछि फ्रेन्चाइज टोली र खेलाडीबीच रकमबारे सम्झौता भएपछि खेल पुनः सञ्चालनमा आएको हो । त्यस्तै टि–२० लिगको सुरुआतबाटै कमेन्ट्री गर्न सुरु गरिरहेका सचिन तिमल्सिनाले नेपाल टि–२० लिगमा म्याच फिक्सिङ भएको आरोप लगाए ।

सचिनले लिगमा हुने फिक्सिङले खेलको नतिजामा असर नपर्ने भए पनि खेलको बीचमा हुने क्रियाकलापमा असर पर्ने गरी फिक्सिङ भइरहेको बताए । नाम नचेलका र नसुनिएका व्यक्तिलाई ल्याएर कप्तान बनाइनु आफैँमा शंकास्पद भएको भन्दै उनले उत्कृत्ट ब्याटिङ र बलिङ गरिरहेका सिकन्दर राजा र सोमपाल कामीलाई हटाइनुले पनि थप पुष्टि गर्ने बताए । सञ्चालनमा आइरहेका सबै फ्रेन्चाईज लिगलाई बन्द गर्दै क्यानले भारतीय कम्पनी सेभेन थ्री स्पोट्र्सलाई आयोजनाको जिम्मा दिएको लिगमा पारिश्रमिक विषयमा पनि खेलाडीहरुले मैदानबाटै माग राखेको छन् । मंगलवारको खेल सुचारु हुनपूर्व क्यान पदाधिकारीले खेलाडीलाई आश्वासन दिँदै मैदान प्रवेश गर्न आग्रह गरेका थिए ।

नेपाली क्रिकेट टिमका पूर्व कप्तान एवं काठमाडौँ नाइट्सका कप्तान ज्ञानेन्द्र मल्लले टिम व्यवस्थापन र आयोजकसमक्ष पारिश्रमिकको माग क्यानसँग राखेको र बुधवारसम्म पारिश्रमिक दिलाउने आश्वासनपछि सहमति भएको बताए । कप्तान मल्लले फिक्सरले आफ्नो टिमका एक खेलाडीलाई म्याच फिक्सिङका लागि प्रस्ताव गरेको दाबी गरे । उनले काठमाडौँ नाइट्सका एक खेलाडीलाई अप्रोच गरेको र यसबारे अनुशासन समितिलाई जानकारी दिइसकेको बताएका थिए ।

यता, विराटनगर तथा नेपाली राष्ट्रिय टिमका कप्तान रोहितकुमार पौडेलले पनि आयोजक टिमसँग पारिश्रमिकको विषयमा कुराकानी हुन नसकेपछि क्यानसँग माग राखेको बताए । प्रतियोगिता बापतको परिश्रमिकको विषयमा खेलाडीले मैदानमा नै माग राख्नुले खेलाडीको क्रिकेट खेल्ने भावनामा ठेस लाग्ने गुनासो गरे ।

मंगलबारको घटनाले क्यानले आयोजना गरेको लिगको फितलोपन उजागर भएको छ । साथै आयोजकको जिम्मेवारी के कति हो भन्ने पनि प्रश्न उब्जिएको छ । आयोजनाको जिम्मा सेभेन थ्री स्पोट्र्सलाई दिने÷नदिने भन्ने विषयमा क्यान भित्रै खेमा बनिरहेको छ । विदेशी खेलाडी असन्तुष्ट हुँदै तालिका अगावै स्वदेश फर्किनु, परिश्रमिक सहमति अनुसार उपलब्ध नहुनले प्रतियोगिताबारे धेरै प्रश्न उठ्न थालेका हुन् ।

नेपाल टी२० लिगमा म्याच फिक्सिङको आशंकामा प्रहरीको केन्द्रीय अनुसन्धान ब्युरो सीआईबीले अनुसन्धान थालेको छ । मंगलबार म्याच फिक्सिङमा संलग्न रहेको आशंकामा सीआईबीले दुई जनालाई नियन्त्रणमा लिएर सोधपुछपछि कागजात गराएर छाडेको हो । सीआईबीले केही दिन अघिबाटै म्याच फिक्सिङको आशंकामा छानबिन थालेको थियो । सीआईबीले अनुसन्धान गरिरहेकै अवस्थामा मंगलबार घटना सार्वजनिक भएको हो । लिगको प्रसारण सम्बन्धी साझेदार नै अनलाइन जुवामा सक्रिय रहनु, खेलको नतिजाबारे सामाजिक सञ्जालमार्फत जुवा सञ्चालन हुनु अनि लिगसँग जोडिएका २ व्यक्तिले म्याच फिक्सिङको गम्भीर आरोप लगाउनुले लिग गम्भीर विवादमा तानिएको छ ।