काठमाडौं, १२ पुस ।
मेलम्चीको पानी उपत्यकाका विभिन्न ठाउँमा चुहावट हुदा सडक जलमग्न भएको छ । करिब साढे तीन सय ठाउँमा चुहावट भएकोमा ९० ठाउँमा मर्मत भएको काठमाडौं उपत्यका खानेपानी लिमिटेड (केयुकेएल) ले जनाएको छ । पुरानै वितरण प्रणालीबाट घरको धारामा वितरण गरिदा मेलम्चीको पानी चुहावट भएको जनाइएको छ । यसरी ठाउँ–ठाउँमा भएको चुहावटले कयौं सडक तथा फुटपाथ जलमग्न बनेका छन् ।
दुई दशकभन्दा लामो समयको मेलम्ची खानेपानी आयोजनाको पानी काठमाडौं उपत्यका भित्रिए पनि यसका विविध पक्षमा समस्या देखिदै आएको छ । मंसिर २९ गतेदेखि पुरै क्षमतामा १७ करोड लिटर पानी उपत्यकाका घरका धाराहरुमा छोडिएको थियो । तर, पुरानै प्रणालीमा पानी वितरण हुदा ठाउँ–ठाउँमा पाइप तथा जडान फुटेकाले सडक एवम् फुटपाथ जलमग्न भएका छन् । मेलम्चीको पानी उपत्यकाको धारामा छोेडिएको १३ दिनमा मात्रै साढे तीन सय ठाउँमा चुहावट भएको थियो । काठमाडौं उपत्यका खानेपानी लिमिटेड (केयूकेएल) ले यसरी चुहावट भएको ९० भन्दा ठाउँमा मर्मत भइसकेको जनाएको छ । पुरानै प्रणालीमा भोलुम थपिदा पाइपमा प्रेसर बढेको र यसको अनुगमन भइरहेको केयुकेएलले जनाएको छ । पानी वितरणमा जति ढिला भयो यसको घाटा केयुकेएललाई पनि रहेको प्रवक्ता प्रकाश राईले बताउदै आएका छन् ।
केयुकेएलले दैनिक वितरण हुने तालिका सार्वजनिक गरिसकेको छ । हाल नयाँ पाइपलाइन विस्तार र परीक्षणको काम भइरहेकाले पुरानै प्रणालीबाट मेलम्चीको पानी वितरण भएको हो । नयाँ वितरण प्रणाली अनुरुप करिब छ सय किलोमिटर पाइपलाइनमा मात्र परीक्षण गरिएको जनाइएको छ । चार सय किलोमिटर पाइपलाइनको परीक्षण बाँकी छ । मेलम्चीको पानी काठमाडौं आएपछि हाल १० किलोमिटर थप पाइपलाइन परीक्षण भएको छ । केयुकेएलले असारसम्म नयाँ पाइपलाइनको विस्तार तथा परीक्षण गर्ने र साउनदेखि नयाँ पाइपलाइनबाट पानी वितरण हुने बताएको छ । कलंकी, धुम्बाराही, कपन र मण्डीखाटार क्षेत्रमा पाइपलाइन बिछ्याउने काम भइरहेको छ । विसं. २०७८ चैतमा पानी आउनुअघि जम्मा सय किलोमिटर नयाँ वितरण लाइनमा ट्यांकरको पानी हालेर परीक्षण गरिएको थियो । बाइट…
अहिले काठमाडौंको न्युरोड, सोह्रखुट्टे, पकनाजोल, लाजिम्पाट, लैनचौर, रत्नपार्क, अनामनगर, बानेश्वर लगायतका क्षेत्रमा खानेपानीको पाइप तथा जडान फुट्दा मुख्य सडक जलमग्न भएको हो ।
ललितपुरको लगनखेल, सातदोबाटो, एकान्तकुना, पुलचोक, जावलाखेल लगायतको सडकखण्डमा चुहावट भएको छ । केयुकेएलले हाल खुमलटार, मीनभवन, अनामनगर, बाँसबारी, महाँकालचौर, महाराजगन्ज र बालाजुको पानीपोखरीबाट पानी वितरण गरिरहेको हो । कीर्तिपुरमा भने पानीपोखरीबाहेक अन्य ठाउँबाट वितरण भएको हो । बल्खुचोकमा मर्मतको काम भइरहेकाले कीर्तिपुर ट्यांकीबाट पानी वितरण हुन अझै समय लाग्नेछ । एकै सडकको दशभन्दा बढि ठाउँबाट पानी चुहावट हुदा सवारी आवगमन तथा पैदाल यात्रुलाई असहज भएको छ ।
प्रतिक्रिया दिनुहोस्